Ўзбекистон Бош консулхонаси дипломатлари кўмагида Санкт-Петербург шаҳрида қийин аҳволда қолган ватандошимиз оиласи бағрига қайтарилди. Бу ҳақда “Дунё” АА хабар берди.
Маълум қилинишича, ўзбекистонлик шахс 2024 йилнинг июлида Россияга вақтинча ишлаш мақсадида келган. У Россия ҳудудида қонуний бўлиш учун зарур бўлган патент ва шахсини тасдиқловчи ҳужжатини йўқотиб қўйган. Шу боис ишга жойлаша олмаган.
Сўнгги кунларда у ижара уйига тўлов учун пули йўқлиги сабабли кўчада қолган. Бош консулхона дипломатлари фуқаронинг яшаш жойини аниқлаб, Ўзбекистонга етиб олиши учун зарур ҳужжатларни расмийлаштиришда ёрдам берди.
Шунингдек, мамлакатга қайтиши учун авиачипта олиб берилган.
Хориждан Ўзбекистонга қайтарилаётган шахслар
Август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди.
Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Россиядаги элчихонанинг ўзбекистонликларга мурожаати
Ўзбекистоннинг Россиядаги элчихонаси мамлакатда ноқонуний юрган ўзбекистонликларни ҳуқуқий мақомини зудлик билан ҳал қилишга чақирди. 5 февралдан бошлаб Россия ҳудудида Россия ИИВ томонидан юритиладиган “назорат қилинадиган шахслар реестри” фаолият кўрсатишни бошлади.
Изоҳ (0)