Rossiyaning Irkutsk viloyati gubernatori Igor Kobzev patent asosida ishlayotgan xorijliklar uchun faoliyat turlariga cheklovlar belgilovchi farmonni imzoladi.
Unga ko‘ra, 2025-yildan boshlab ularga yo‘lovchi tashishning ayrim turlarini amalga oshirish, jumladan, taksida ishlash taqiqlanadi. Shuningdek, xorijliklar gidlik qilish, bola parvarishi bilan shug‘ullana olmaydi va ta’lim muassasalarida ish topa olmaydi.
Farmonga ko‘ra, kelasi yildan boshlab xorij fuqarolarining o‘rmon xo‘jaligi, dorivor mahsulotlar ishlab chiqarish, jumladan, hayvonlar uchun dori vositalari kabi tarmoqlarda, yog‘och, tamaki va alkogolli mahsulotlar ulgurji savdosida ham faoliyat yuritishi taqiqlanadi.
Cheklov shahar ichida va undan tashqarida yo‘lovchi tashishga taalluqlidir. Kelgusi yildan boshlab xorijliklarning geologiya-qidiruv va yer qa’rini o‘rganish hamda mineral-xomashyo bazasini qayta ishlab chiqarish bilan bog‘liq boshqa turdagi ishlar bilan shug‘ullanishiga ham yo‘l qo‘yilmaydi.
Iyun oyida Irkutsk viloyati IIV vakili Aleksandr Sverlov 2024-yilning o‘tgan besh oyi yakunlari bo‘yicha viloyatga 38 mingdan ortiq xorijiy fuqarolar kelganini ma’lum qilgan.
Avvalroq Rossiya mehnat vaziri Anton Kotyakov Ichki ishlar vazirligi bilan birgalikda mehnat muhojirlarini jalb qilishning amaldagi tizimini o‘zgartirish ko‘rib chiqilayotgani xabar qilingan edi.
Kotyakov Rossiya muhojirlarning erkin kirishini taqiqlashi va “sivilizatsiyalashgan model”dan foydalanishi mumkinligi haqida fikr bildirgan. U amaldagi model biznes uchun ma’lum xavflarni keltirib chiqarishi, chunki ish beruvchilar migrantlarni o‘qitish va tibbiy ko‘rikdan o‘tkazish xarajatlarini qoplashini aytgan.
Izoh (0)