Xitoy Tashqi ishlar vaziri Van I Pekinning Rossiya va AQSH o‘rtasida Ar-Riyodda erishilgan kelishuvni qo‘llab-quvvatlashini ma’lum qildi. Bu Xitoy yuqori lavozimli vakilining o‘tkazilgan Rossiya-AQSH muzokaralari bo‘yicha birinchi sharhi bo‘ldi.
Xitoy tinchlikka erishishga qaratilgan barcha harakatlarni, shu jumladan Qo‘shma Shtatlar va Rossiya o‘rtasida yaqinda erishilgan kelishuvni qo‘llab-quvvatlaydi hamda tomonlar o‘zaro xavotirlarini bartaraf etadigan barqaror va uzoq muddatli yechim topishlarini kutmoqda. Xitoy tomonlarning so‘rovlariga muvofiq va xalqaro hamjamiyat, ayniqsa, global Janubning tashvishlarini inobatga olgan holda inqirozni siyosiy yo‘l bilan hal etishda bundan buyon ham konstruktiv rol o‘ynashga tayyor, deyiladi Van I bayonotida.
Vazirning ta’kidlashicha, Pekin 2024-yil aprelda XXR raisi Si Szinpin tomonidan shakllantirgan to‘rtta tamoyilga muvofiq “tinchlikni faol ravishda ilgari surmoqda”. Ushbu tamoyillar “tinchlik va barqarorlikni saqlash”, urushning jahon iqtisodiyotiga salbiy ta’sirini yumshatish va kamaytirish hamda ta’minot zanjirlarining uzilishini oldini olish zarurligini o‘z ichiga oladi.
Van I Yohannesburgdagi G20 sammitida Rossiya TIV rahbari Sergey Lavrov bilan uchrashdi. Rossiya tashqi ishlar vazirligi uchrashuvda Ukraina masalasi ham muhokama qilinganini ma’lum qildi, ammo batafsil ma’lumot bermadi. Rossiya prezidenti matbuot kotibi Dmitriy Peskov Vladimir Putin yaqin kunlarda Si Szinpin bilan telefon orqali suhbatlashishini ma’lum qildi.
Joriy yilning 18-fevral kuni AQSH va Rossiya delegatsiyalari Saudiya Arabistoni poytaxtida muzokaralar o‘tkazdi.
Uchrashuvda ishtirok etgan Rossiya prezidenti yordamchisi Yuriy Ushakov muzokaralar samarali o‘tganini, tomonlar kelajakda bir-birining manfaatlarini inobatga olishga kelishib olganini ma’lum qildi.
Biz shunchaki bir-birimizning manfaatlarimizni hisobga olishga kelishib oldik. Shu bilan birga, ikki tomonlama munosabatlarni rivojlantirish ustida ham ishlaymiz, chunki bu Moskva va Vashington uchun birdek muhim, dedi Ushakov jurnalistlarga.
Delegatsiyalar, jumladan, Rossiya va AQSH rahbarlari Vladimir Putin va Donald Trampning uchrashuvini ham muhokama qilishdi.
Bu masala ko‘rib chiqildi, biz bunday uchrashuv uchun sharoit yaratish ustida ishlaymiz, dedi Rossiya prezidenti yordamchisi.
Uning so‘zlariga ko‘ra, muzokaralar jarayonida Ukraina masalasi ham ko‘tarilgan. Tomonlar “ushbu mavzu bo‘yicha muzokarachilarning alohida guruhlari o‘z vaqtida aloqaga kirishishi”ga kelishib oldilar.
Muzokaralarda Rossiya tomonidan TIV rahbari Sergey Lavrov va Yuriy Ushakov ishtirok etdi. AQSH tomonidan davlat kotibi Marko Rubio, Markaziy razvedka boshqarmasi direktori Jon Retkliff, milliy xavfsizlik bo‘yicha maslahatchi Mayk Uolts va maxsus vakil Stiv Uitkofflar vakillik qildi.
Kremlga ko‘ra, muzokaralar birinchi navbatda Rossiya-AQSH munosabatlarini tiklashga, shuningdek, Ukraina mojarosi bo‘yicha ehtimoliy aloqalar istiqbollariga bag‘ishlangan
Izoh (0)