Sankt-Peterburgda yong‘indan odamlarni qutqargan o‘zbekistonlikka surat sovg‘a qilishdi

Sankt-Peterburgda yuz bergan yong‘in paytida odamlarni qutqargan o‘zbekistonlik farrosh Olimjon Ibrohimovga surat sovg‘a qilishdi. “Fontanka” nashri u bilan suhbatlashib, Olimjonning oilasi, ish va yashash tarzi haqida ma’lumot oldi.

Ibrohimov 7 yil avval oilasi bilan Sankt-Peterburgga kelgan. Bu vaqt ichida u odamlarni ikki marta yong‘indan qutqarib qolgan, ammo ikkinchi marta u federal shon-sharafga erishgan. Jumladan, 25-aprel kuni u yonayotgan xonadonga suv oqishiga mo‘ljallangan truba orqali ko‘tarilib, ayollarga yordam ko‘rsatgan. Bu harakatlari tufayli unga faxriy yorliq, ish kiyimi va surat sovg‘a qilishgan.

Olimjonga surat Admiralteysk tumani ma’muriyati rahbari Sergey Overchuk tomonidan berilgan. U buni Rossiya prezidenti Vladimir Putin va Rossiya Xavfsizlik kengashi raisi o‘rinbosari Dmitriy Medvedev surati ilingan xonaga osib qo‘yishga va’da bergan.

“O‘zbekistonlikman, Farg‘onada havo-desant qo‘shinlarida xizmat qilganman. Hech qanday harbiy harakatlarda qatnashmadim, lekin biz har kuni, tom ma’noda bir necha soat mashq qilardik. Misol uchun, bir qo‘l bilan ushlab, yettinchi, hatto to‘qqizinchi qavatga ko‘tarilish va keyin pastga tushish kerak edi. 15 yil xizmat qildim, men uchun bu oson edi va menga yoqardi. Shu vaqt ichida boks bo‘yicha sport ustasi bo‘ldim”, — deydi 48 yoshli Olimjon Ibrohimov.

U 7 yildan beri Rossiyada yashab, farrosh bo‘lib ishlayotganini ma’lum qildi.

“Xizmatdan nafaqaga chiqib, qizimni turmushga berganimda xotinim bilan o‘tirib, qanday ish qidirishni o‘ylay boshladik. Shu tariqa Rossiyaga ketdik”, — dedi u.

OIimjonning ta’kidlashicha, bir yilcha oldin u Vereyskaya ko‘chasida yuz bergan yong‘in paytida ham odamni qutqargan. 

“Yong‘in sodir bo‘ldi, qurbon bor edi. Men ayolga yordam berdim, u alanga ichidan tirik chiqdi. O‘shanda menga sertifikat berishdi. Yordam berish burchimiz. Xudo hammani ko‘rib turibdi. Biz odamlarmiz va bir-birimizga yordam berishimiz kerak.

Xotinim ham farrosh bo‘lib ishlaydi. U mening jismoniy tayyorgarligim normal ekanini biladi. Qizim ham farrosh. Biz bitta brigadada ishlaymiz. Yong‘in bizga qarashli hududda sodir bo‘lgandi. Maosh kam, lekin biz bir-birimizga yordam beramiz, mehnatkashmiz. Oyiga 45 ming rubl (6 million so‘mdan ziyod) olaman, 10 mingi patent va ro‘yxatga olish uchun sarflanadi, yana 10 mingini uy uchun to‘layman. 25 ming yashash uchun qoladi. Bu normal — yashash mumkin”, — ta’kidladi Olimjon.

U unga sovg‘a qilishgan rasmni xonasiga osib qo‘yishini qo‘shimcha qildi.

“Besh kishi yashaymiz. Qizim nevaram bilan alohida yashashadi. Xonamizga rasmni esdalik sifatida osib qo‘yamiz. Bizda allaqachon Vladimir Putin va Dmitriy Medvedevning portreti osilgan”, — deya ta’kidladi u.