Katta yettilik mamlakatlari moliya vazirlari Rossiyaning muzlatilgan aktivlaridan tushgan mablag‘lar hisobidan to‘lanadigan Ukrainaga 50 milliard dollarlik kredit tafsilotlari haqida bayonot e’lon qildi.
To‘lovlar 2024-yil dekabr oyida boshlanishi kutilmoqda. Barcha mablag‘lar 2027-yil oxirigacha o‘tkaziladi. G7 mamlakatlari moliya vazirliklari rahbarlarining qo‘shma bayonoti Kanada hukumati tomonidan eʼlon qilindi.
“Asosiy qarz va foizlar bizning huquqiy tizimlarimiz va xalqaro qonunchiligimizga muvofiq, Yevropa ittifoqi va boshqa G7 mamlakatlari yurisdiktsiyalarida joylashgan Rossiya suveren aktivlarini immobilizatsiya qilishdan kelib chiqadigan favqulodda tushumlar hamda boshqa har qanday ixtiyoriy badallar hisobidan qoplanadi”, deyiladi hujjatda.
Kreditlar G7 mamlakatlari tomonidan ikki tomonlama formatda taqdim etiladi. Ularning har biri 2025-yil 30-iyundan kechiktirmay kuchga kiradi. G7 mamlakatlariga kreditlarni to‘lash uchun mablag‘lar “har bir ikki tomonlama kreditning asosiy summasiga mutanosib ravishda” taqsimlanadi.
G7 yetakchilari avvalroq Ukrainaga 50 milliard dollar miqdorida kredit ajratish bo‘yicha kelishuv haqida bayonot e’lon qilishgandi.
Katta yettilikka Buyuk Britaniya, Germaniya, Italiya, Kanada, Fransiya, Yaponiya va AQSH kiradi. Ma’lumki, Qo‘shma Shtatlar Ukrainaga 20 milliard dollar, Buyuk Britaniya — 2,26 milliard funt sterling miqdorida kredit yuborishni rejalashtirmoqda.
Yevropa ittifoqi esa 35 milliard yevrogacha mablag‘ ajratishga tayyorligi ma’lum qilingan.
Izoh (0)