Italiya hukumati G7 tashqi ishlar vazirlarining Fyuje shahrida bo‘lib o‘tgan yig‘ilishida Isroil bosh vaziri Binyamin Netanyaxuni hibsga olish uchun Xalqaro jinoyat sudi (XJS) orderi masalasida murosaga kelishga harakat qilmoqda. Bu haqda Il Messaggero gazetasi xabar qildi.
Rim Yaqin Sharqdagi mojaro tugamaguncha buyruq ijrosini to‘xtatishni taklif qildi.
Rim statutini ratifikatsiya qilgan davlatlar XJS buyrug‘ini bajarishi shart. Il Messaggero yozganidek, Italiya XJS qaroriga hurmat ko‘rsatishga intiladi, ammo Yaqin Sharq mojarosini hal qilish uchun Binyamin Netanyaxu bilan muloqot qilish zarurligini ta’kidlamoqda, shuning uchun order masalasi keyinga qoldirilishi kerak, deb hisoblaydi.
“Yettilik guruhi”ga (G7 — Group of seven) Buyuk Britaniya, Germaniya, Italiya, Kanada, AQSH, Fransiya, Yaponiya kiradi. Binyamin Netanyaxuni hibsga olish orderi yuzasidan assotsiatsiya davlatlarining pozitsiyasi boshqacha. Qo‘shma Shtatlar XJS yurisdiksiyasini tan olmaydi va shu bilan birga sud qarorini qoralab, Isroilni qo‘llab-quvvatlaydi. Yevropa ittifoqi, o‘z navbatida, buyruqni bajarishga majbur, deb eslatdi Yevropa diplomatiyasi rahbari Jozep Borrel.
Buyuk Britaniya, Fransiya, Germaniya va Kanada XJS qarorini e’tiborsiz qoldirib bo‘lmaydi, deb e’lon qildi. Italiya tashqi ishlar vaziri va bosh vazir o‘rinbosari Antonio Tayani sudning pozitsiyasini noto‘g‘ri deb atadi, chunki prokurorlar shu bilan “7-oktyabrdagi qirg‘inni uyushtirgan odamni demokratik yo‘l bilan saylangan bosh vazirga tenglashtirgan”.
Antonio Tayani sheriklari bilan bir qarorga kelish uchun XJS hujjatlarini o‘rganishga va’da berdi.
XJS 21-noyabr kuni Binyamin Netanyaxu va sobiq mudofaa vaziri Yoav Galantni hibsga olishga order berdi. Tergov ularning G‘azo sektoridagi tinch aholini yashash uchun zarur bo‘lgan suv, dori-darmon, oziq-ovqat, tibbiy jihozlar, yoqilg‘i va elektr energiyasidan “qasddan mahrum qilgan” deb hisobladi. Il Messaggero yozishicha, shu sababli bugungi kunda Binyamin Netanyaxu Yevropaga sayohat qilishdan tiyilmoqda.
Yevropa diplomatiyasi rahbari Jozep Borrel xalqaro jinoyat sudining Netanyaxuni hibsga olish bo‘yicha qarori ijro etilishi shartligini ta’kidlagan.
Izoh (0)