AQSH prezidenti Donald Tramp ma’muriyati sobiq prezident Jo Bayden davrida Qo‘shma Shtatlarga kirishga ruxsat berilgan Lotin Amerikasi va Ukrainadan kelgan muhojirlarning barcha immigratsiya arizalarini ko‘rib chiqishni to‘xtatdi. Bu haqda Amerikaning ikki rasmiysiga tayanib, CBS News xabar berdi.
AQSH hukumatining qarori mamlakatda qonuniy asosda qolish imkonini beruvchi turli immigratsiya imtiyozlarini olish uchun ariza topshirish jarayonida bo‘lgan muhojirlarga ta’sir qiladi.
Arizalarni ko‘rib chiqish noma’lum muddatga to‘xtatildi, ushbu davrda amaldorlar firibgarlik bo‘yicha arizalarni tekshirish, shuningdek, tekshirish tartib-qoidalarini takomillashtirish bilan shug‘ullanadi, deyiladi xabarda.
Taqiq Bayden ma’muriyatining xorijliklarga gumanitar sabablarga ko‘ra AQSHda vaqtincha qolishga ruxsat bergan bir nechta dasturlarini qamrab oladi. Ushbu dasturlar orasida “Ukraina uchun birlashish” (Uniting for Ukraine) bo‘lib, unga ko‘ra ukrainaliklar moliyaviy homiylar mavjud bo‘lgan taqdirda vaqtinchalik maqom bilan AQSHga kirishlari mumkin edi.
CHNV nomi bilan tanilgan yana bir dastur Qo‘shma Shtatlarda homiylarga ega bo‘lgan Venesuela, Gaiti, Nikaragua va Kubadan kelganlarga tegishli. Uchinchi dastur AQSHda qarindoshlari bo‘lgan Markaziy Amerika, Kolumbiya, Ekvador, Gaiti va Kubadan kelgan shaxslar uchun mo‘ljallangan.
Tramp ma’muriyati yanvar oyida xorijliklarga AQSHda vaqtincha yashash imkonini beruvchi dasturlar, jumladan, “Ukraina uchun birlashish” dasturi doirasida yangi muhojirlarning kirishini to‘xtatdi. Shu bilan birga, xorijliklarning bir qismi allaqachon AQSHda bo‘lib, mamlakatda doimiy yashash uchun ruxsat olishni kutayotgan edi.
Yuqorida tilga olingan uchta dastur doirasida AQSHga kelgan xorijliklarning ko‘pchiligi faqat vaqtinchalik ishlash uchun ruxsatnoma va deportatsiyadan ikki yillik himoyaga ega bo‘lganligi sababli, ularning ba’zilari boshqa immigratsiya imtiyozlarini olish uchun murojaat qilishgan, deydi huquqshunoslar.
Biroq AQSH hukumati Fuqarolik va immigratsiya xizmati xodimlari Bayden davrida kirishga ruxsat berilgan muhojirlar tomonidan berilgan bo‘lsa, ushbu dasturlar uchun ham, boshqa har qanday imtiyozlar uchun ham arizalarni qayta ko‘rib chiqmaslikka qaror qildi.
CBS News ma’lumotlariga ko‘ra, “Ukraina uchun birlashish” dasturi doirasida Tramp prezidentlik lavozimiga kirishishidan oldin AQSHga mamlakat fuqarolari homiyligida 240 mingga yaqin ukrainalik kelgan. CHNV dasturi orqali Kuba, Gaiti, Nikaragua va Venesueladan Qo‘shma Shtatlarga 530 ming kishi kirib kelgan.
Izoh (0)