АҚШ Украинадаги жанговар ҳаракатлар бошланганининг учинчи йиллигига бағишланган G7 (“Еттилик гуруҳи”) баёнотида Россияни “тажовузкор” деб аташга қаршилик кўрсатмоқда. Бу ҳақда Financial Times вазиятдан хабардор бешта манбага асосланиб хабар берди.
Америкаликлар бу таърифни тақиқламоқда, аммо биз ҳали ҳам у устида ишламоқдамиз ва келишувга эришишга умид қилмоқдамиз, деди нашр суҳбатдоши.
У Москва ва Киев ўртасида “фарқ қўйиш” зарурлигини таъкидлади.
Газета маълумотларига кўра, Украина президенти Владимир Зеленскийнинг G7 саммитида иштироки ҳали тасдиқланмаган. Тадбир 24 февраль куни видеоалоқа орқали ўтказилади.
FT’нинг икки суҳбатдошига кўра, АҚШ президенти Дональд Трамп маъмурияти жанговар ҳаракатларни шарҳлашда уларни “Украина можароси” деб атамоқда.
Reutersънинг хабар беришича, АҚШ бу йил Украинанинг ҳудудий яхлитлигига содиқликни тасдиқлаш ва “Россия тажовузи”ни қоралашга қаратилган, жанглар бошланганининг 3 йиллигига бағишланган БМТ резолюциясининг ҳаммуаллифи бўлмайди.
Ўтган йилги G7 давлатларининг қўшма баёнотида Россиянинг ҳаракатларига нисбатан “тажовуз” сўзи беш марта ишлатилган эди.
Трамп ва Зеленский сўнгги ҳафта давомида бир-бирини бир неча бор очиқчасига танқид қилди. Жумладан, республикачи Россия–Украина уруши бошланиши учун жавобгарликни Киевга юклади:
Сиз буни ҳеч қачон бошламаслигингиз керак эди. Келишувга эришишингиз мумкин эди, дейди АҚШ етакчиси.
У Украина президентини “сайловсиз диктатор” деб атади.
Сайловсиз диктатор. Зеленский тезроқ ҳаракат қилиши керак, акс ҳолда унинг мамлакати буткул тамом бўлади. Биз Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва унинг маъмурияти уддалай олишини барча эътироф этди, дейди АҚШ етакчиси.
Зеленский эса Трамп Россия дезинформацияси қурбонига айланганини айтди.
Россия президенти Владимир Путин тажовузни Киев кўрсатганига ишонч билдирди:
Украина режими тажовузни Россияга қарши бошлагани йўқ, у биз тан олган Луганск ва Донецк халқ республикаларига қарши улар Россия таркибига киришидан олдинроқ тажовузни бошлаган эди.
Изоҳ (0)