Ukraina prezidenti Vladimir Zelenskiy Xitoy rahbari Si Szinpin unga Rossiyaga qurol yetkazib bermaslikka va’da berganini aytdi, deya Deutsche Welle xabar berdi.
Men Xitoy rahbari bilan telefonda gaplashdim. U Rossiyaga qurol sotmasligini aytdi. Ko‘ramiz. Agar u axloqli odam bo‘lsa, unday qilmaydi. Chunki u menga so‘z berdi, — dedi Zelenskiy Italiyadagi G7 sammiti doirasidagi matbuot anjumanida.
Shuningdek, Zelenskiy sammitda AQSH va Ukraina o‘rtasida tuzilgan xavfsizlik kelishuvini Ukrainaning NATOga aʼzo bo‘lishi yo‘lidagi muhim qadam deb atagan.
Shartnomada AQSH Ukrainaning kelajakdagi NATO aʼzoligini qo‘llab-quvvatlashi va xavfsizlik kelishuvi Ukrainaning NATOga aʼzo bo‘lishi uchun ko‘prik ekanligini tan olishi aytiladi, — deya qo‘shimcha qilgan Ukraina rahbari.
Rossiya bilan hamkorligi yuzasidan Xitoyga nisbatan ayblovlar
Avvalroq Buyuk Britaniya mudofaa vaziri Grant Shapps Xitoyni Rossiyaga halokatli qurol yetkazib berishda ayblagan edi. U Rossiya va Xitoy o‘rtasida qurollar sohasida hamkorlik bo‘yicha dalillarga ega ekanligini aytgan.
Shuningdek, Germaniya va AQSH hukumati Xitoyni Rossiya bilan sanksiyalarni chetlab o‘tishda hamkorlik qilishdan ogohlantirgan. Bloomberg’ga ko‘ra, Pekin Moskvani harbiy maqsadlar uchun geofazoviy razvedka ma’lumotlari, shuningdek, harbiy sanoat uchun zarur bo‘lgan mikroelektronika, tanklar ishlab chiqarish uchun mashinalar va raketalar yonilg‘isi bilan ta’minlaydi.
Izoh (0)