Ukraina prezidenti Vladimir Zelenskiy Kiyev va Moskva o‘rtasidagi ziddiyat bo‘yicha o‘z nuqtayi nazarini bildirishi uchun Arab davlatlari ligasi (ADL) sammitiga taklif olgan. Bu haqda Saudiya Arabistoni tashqi ishlar vaziri Faysal bin Farxon Ol Saud Al Arabiya va Al-Jazeera telekanallariga ma’lum qildi.
Vazirning qayd etishicha, sammit ishtirokchilari urushning har ikki tomoni pozitsiyasini eshitish imkoniyatini olqishlaydi. TIV rahbari nizoni muloqotdan boshqa yo‘l bilan hal qilish imkonsizligini ta’kidladi. Uning so‘zlariga ko‘ra, arab davlatlarining inqirozga munosabati “ijobiy neytral” bo‘lib qolmoqda.
Vazir, shuningdek, Rossiya prezidenti Vladimir Putinning sammit ishtirokchilariga maktubini olqishladi. Matn Kreml saytida e’lon qilingan bo‘lib, unda arab davlatlari bilan hamkorlikni kengaytirish, mintaqadagi mojarolarni hal qilishga yordam berish haqida gap boradi. Ukraina haqida so‘z yuritilmagan.
Zelenskiy Saudiya Arabistoniga tashrif buyurganidan so‘ng (bu uning mamlakatga birinchi tashrifi edi) Twitter’da Ukrainaning hududiy yaxlitligi va suverenitetini qo‘llab-quvvatlagan bosh vazir va Qirollik valiahdi Muhammad bin Salmon Ol Saudga minnatdorlik bildirdi. Shuningdek, u Kuvayt, Birlashgan Arab Amirliklari, Ummon va Iroq vakillari bilan ikki tomonlama uchrashuvlar o‘tkazganini qo‘shimcha qildi.
Arab davlatlari ligasi 1945-yil 22-martda Qohirada tashkil etilgan. ADL asoschilari — Misr, Iroq, Livan, Saudiya Arabistoni, Suriya, Iordaniya va Yamandir.
Endi Ukraina rahbari 19—21-may kunlari G7 mamlakatlari (guruhga AQSH, Buyuk Britaniya, Germaniya, Fransiya, Italiya, Kanada va Yaponiya kiradi) sammiti bo‘lib o‘tayotgan Yaponiyaga boradi. Zelenskiy ofisi rahbari Andrey Yermak Ukraina prezidentining tadbirda shaxsan ishtirok etishini, shuningdek, amerikalik hamkasbi Jo Bayden bilan uchrashuv o‘tkazishini va u bilan dolzarb masalalarni muhokama qilishini tasdiqladi.
Izoh (0)