Украина президенти Владимир Зеленский жорий йилнинг 19 февраль кунига режалаштирилган Саудия Арабистонига ташрифи кечиктирилганини эълон қилди.
У бугунги Россия ва АҚШ расмий вакиллари ўртасидаги учрашувдан сўнг “тасодифлар” бўлишини истамаслигини таъкидлади.
У ерда ким қолади, ким кетади, ким қаерга боришини билмайман. Очиғини айтсам, менга фарқи йўқ. Лекин ҳамкорларимиз биз ҳақимизда ортиқча фикр юритишларини истамайман. Мен тасодифларни хоҳламайман, шунинг учун эртага Саудия Арабистонига бормайман, деди Зеленский Туркия президенти Ражаб Тоййиб Эрдоған билан учрашувдан сўнг Анқарада ўтказилган матбуот анжуманида.
Украина етакчиси, шунингдек, АҚШ ва Россия делегацияларининг ўтган учрашувига изоҳ бериб, Украина Россиянинг ультиматумларини қабул қилмаслигини яна бир бор қайд этди. У уруш бошида Россия Украинага шарт қўйганини, хусусан, Украина армияси сонини камайтириш, ҳудудий ён беришлар, шунингдек, мамлакат раҳбариятига Россия тарафдори бўлган раҳбариятни қўйишни талаб қилганини айтди.
Менда шундай таассурот борки, ҳозир қандайдир музокаралар бўлиб ўтмоқда ва улар худди ўша кайфиятда кечмоқда, аммо улар Россия вакиллари ва АҚШ вакиллари ўртасида бўлиб ўтмоқда. Украина ҳақида, яна Украина ҳақида ва Украина иштирокисиз. Қизиқ, агар биз энг оғир пайтда бу ультиматумларнинг барчасини рад этган бўлсак, ҳозир Украина бунга кўнади, деган фикр қаердан пайдо бўлди, дейди Зеленский.
Зеленский идораси хабар қилишича, Ар-Риёдга ташриф 10 мартга режалаштирилган. Шу билан бирга, Зеленский АҚШ расмийларини Киевда кутаётганларини қўшимча қилди.
Россия ва АҚШ Ар-Риёдда музокаралар ўтказди
Россия ва АҚШ делегациялари Россия–Украина уруши якунларига бағишланган музокаралар ўтказди. Учрашув 18 февраль куни Саудия Арабистони пойтахти Ар-Риёдда бўлиб ўтди. Музокаралар Саудия Арабистони қироллик оиласининг Альбасатин мажмуасидаги саройларидан бири — Дирияъда ўтказилди. Учрашувда Украина ва Европа давлатлари вакиллари иштирок этмади.
Музокараларда Россия номидан ташқи ишлар вазири Сергей Лавров, президент ёрдамчиси Юрий Ушаков, шунингдек, Россия тўғридан-тўғри инвестициялар жамғармаси раҳбари Кирилл Дмитриев иштирок этди. Россия делегацияси таркибига ТИВнинг Умумевропа ҳамкорлиги департаменти директори ўринбосари Дмитрий Балакин ва Россиянинг Канададаги элчихонаси маслаҳатчи-вакили Владимир Проскуряков ҳам кирган. Учрашувда АҚШ номидан давлат котиби Марко Рубио, президентнинг миллий хавфсизлик бўйича маслаҳатчиси Майк Уолц ва президентнинг Яқин Шарқдаги махсус вакили Стив Уиткофф иштирок этди.
Музокаралар тахминан тўрт ярим соат давом этди.
Ушаковнинг таъкидлашича, томонлар Путин ва Трамп учрашувига тайёргарликни муҳокама қилган, бироқ бу учрашув кейинги ҳафтада ўтказилиши даргумон.
Россия ва АҚШ музокарачиларининг алоҳида гуруҳлари Украина бўйича алоқага киришади. Ким Россиядан музокарачилар сафига кириши ва Украина бўйича алоқалар қачон бошланишини Путин ҳал қилади, деди у.
Дмитриев музокаралар якунида муроса ҳақида гапиришга ҳали эрта эканини, томонлар бир-бирини тинглашни бошлаганини айтди, унинг сўзларига кўра, “Россия ва АҚШ вакиллари ҳурмат билан ва тенг ҳуқуқли мулоқот қилган”, деб ёзади Reuters.
Изоҳ (0)