Ukraina rahbari Vladimir Zelenskiy 12-iyun kuni Saudiya Arabistonining Jidda shahrida mamlakat taxt vorisi bilan uchrashgan. Bu haqda Al Arabiya nashri xabar berdi.
Manbada aytilishicha, chorshanba kuni Zelenskiy Jiddaga eʼlon qilinmagan tashrif bilan kelgan. Prezidentni Saudiya shahzodasi Muhammad bin Salmon shaxsan kutib olgan.
Ukraina prezidentini kutib olish tadbirida ko‘plab Saudiya hukumati rasmiylari, mamlakatning milliy xavfsizlik bo‘yicha maslahatchisi va vazirliklar xodimlari ishtirok etgan. Aeroportda kutib olingan Zelenskiy yopiq muzokara uchun qirollik saroyiga olib ketilgan.
Zelenskiyning Saudiya Arabistoniga borishdan maqsadi va dasturi haqida maʼlumot mavjud emas. Ikki tomon muzokaralar asosan yopiq ko‘rinishda kechishi xabar qilingan.
Saudiya Arabistoni Rossiya va Ukraina o‘rtasidagi munosabatlarda o‘zini potensial vositachi sifatida ko‘rsatib keladi. Hozirga qadar Kiyev bir necha bor Moskva bilan muzokaralarda vositachilik qilishni Ar-Riyoddagi hukumatdan so‘ragani ham maʼlum.
O‘tgan yilning avgust oyida Saudiya Arabistoni urush bo‘yicha muzokaralar amalga oshirish uchun konferensiya o‘tkazgan edi. Unda 40 dan ortiq davlat ishtirok etgan. Moskva konferensiyada qatnashishdan bosh tortgan.
Prezident Zelenskiy oxirgi marta joriy yilning fevral oyida Saudiya Arabistoniga tashrif buyurgan edi. U Saudiya Arabistoni valiahd shahzodasi Muhammad bin Salmon bilan o‘zining tinchlik rejasini ilgari surish va potensial harbiy asirlar almashinuvini muhokama qilish uchun muzokaralar o‘tkazgan.
Izoh (0)