Oq uy Shveysariyada bo‘lib o‘tadigan Ukraina bo‘yicha tinchlik sammitda AQSH vitse-prezidenti Kamala Harris ishtirok etishini rasman e’lon qildi.
Avvalroq Jo Bayden sammitga bormasligi, chunki u Kaliforniyadagi saylov kampaniyasi uchun mablag‘ yig‘ish marosimida bo‘lishi aytilgan edi.
Oq uyga ko‘ra, 15-iyun kuni AQSH vitse-prezidenti Tinchlik sammitida ishtirok etish uchun Shveysariyaga boradi.
Vitse-prezident Bayden maʼmuriyatining Ukraina suvereniteti va hududiy yaxlitligi, BMT nizomi tamoyillari asosida adolatli hamda mustahkam tinchlikni taʼminlashga qaratilgan saʼy-harakatlarini qo‘llab-quvvatlashini taʼkidlaydi, – deyiladi Oq uy bayonotida.
Tinchlik sammitida milliy xavfsizlik bo‘yicha maslahatchi Jeyk Sallivan ham bo‘lishi aytilgan. Ukraina prezidenti Vladimir Zelenskiy sammitda AQSH prezidenti Jo Baydenni shaxsan o‘zi ko‘rishni xohlashini aytgan edi.
Tinchlik sammiti 15—16-iyun kunlari Shveysariyaning Lyutsern shahri yaqinidagi Byurgenshtok kurortida bo‘lib o‘tadi. Unda dunyoning kamida 107 davlati ishtirok etadi. Zelenskiyga ko‘ra, Tinchlik sammiti Ukraina uchun BMT nizomi va xalqaro huquq normalariga muvofiq keng qamrovli, adolatli va mustahkam tinchlikka erishish uchun muloqot maydoniga aylanadi.
Xitoy, Saudiya Arabistoni, Braziliya, JAR va Pokiston mazkur sammitda ishtirok etishdan bosh tortgan.
Izoh (0)