Shanxaylik qizcha onasiga tegishli 140 ming dollarlik qiymatga ega qimmatbaho taqinchoqlarni uyidan o‘g‘irlab, ularni atigi 8 dollarga sotib yubordi. O‘smir qiz o‘ziga yangi sirg‘a sotib olish uchun shunday yo‘l tutgan.
Ayol o‘ziga tegishli nefrit bilaguzuklar, zanjirlar va boshqa qimmatbaho buyumlar yo‘qolganini bilib, politsiyaga murojaat qilgan. Uning qizi esa o‘ziga yangi sirg‘a va kundalik cho‘ntak puliga ega bo‘lish uchun zargarlik buyumlarini do‘konga arzon narxga berib yuborgan. Bundan tashqari, qiz ularning haqiqiy qiymatini bilmagan va taqinchoqlarni qalbaki deb o‘ylagan.
“Qizim nima uchun taqinchoqlarimni sotib yuborganini bilmas edim. O‘sha kuni u o‘ziga pul kerakligini aytdi. Qizimdan unga qancha kerakligini so‘rasam, u 60 yuan, dedi. Mening pullarni nima qilasan, degan savolimga:
Lablariga pirsing qilgan dugonamga havasim keldi va men ham shunday qilishni istayman, deya javob berdi”, qo‘shimcha qildi ayol.
Huquq-tartibot idoralari xodimlari uning arizasini darhol ko‘rib chiqdi va taqinchoqlar sotilgan do‘konga yetib bordi. Ular videokuzatuv kameralarini tekshirib, do‘kon rahbariyati bilan bog‘lanishdi. Ular ham vaziyatni tushunib, taqinchoqlarni qaytarib berishdi.
“O‘sha kuni do‘kon egalari uyda yo‘q edi, shuning uchun biz ular bilan bog‘lanib, masalani hal qilish uchun politsiya bo‘limiga kelishlarini iltimos qildik”, dedi politsiya xodimi Fan Gaotsze.
Ushbu voqea internetda jamoatchilik noroziligiga sabab bo‘ldi. Foydalanuvchilar nima uchun qimmatbaho zargarlik buyumlariga ega bo‘lgan oilada ota-ona farzandiga ozgina bo‘lsa ham kundalik xarajatlar uchun pul ajratmasligini tanqid qildi.
Izoh (0)