Amerikaning PETA kompaniyasi moda sohasida asl charmdan foydalanish muammosiga odamlarning e’tiborni jalb qilishning noodatiy usulini izlab topdi. Nyu Yorkning markaziy ko‘chalarida sun’iy intellekt o‘rnatilgan buzoq ko‘rinishidagi robot paydo bo‘ldi. U hayvonlar huquqlari uchun kurash olib bormoqda va nafaqat sigirlar, balki charm tayyorlash uchun qurbon bo‘ladigan barcha hayvonlarga nisbatan shafqatsiz munosabatlarni chek qo‘yishni targ‘ib qilmoqda.
Ushbu loyiha zamonaviy charm sumkalar, poyabzal va kiyimlar ortida tirik mavjudotlarning hayoti zomin bo‘lganini eslatishni hamda vegan mahsulotlardan foydalanishni targ‘ib qilishni maqsad qilgan.
Charli XC Cow deb nomlangan robot-buzoq mexanik qurilmaga o‘rnatilgan, uning boshi 3D printerda chop etilgan. Ustida esa “Faqat vegan kiyimlarni xarid qiling” yozuvi tushirilgan bandana bor. Charli XC gavjum ko‘chalarni sayr qiladi va o‘tib ketayotgan insonlar bilan jonli muloqot qiladi.
Robot charm ko‘ylagi, poyabzali yoki charm sumkasi bo‘lgan odamni payqab qolishi bilanoq uning yoniga boradi va g‘azab bilan so‘zlay boshlaydi: “Onamni ko‘tarib yuribsizmi?” yoki “Sumkangizdagi charm bir bechoraning terisi edi!”, deydi. Ba’zan robot qo‘shib ham qo‘yadi: “To‘xta, o‘g‘ri! Bu charm kurtka mening singlim edi!”.
Bunday keskin, ammo tezda ta’sir qiladigan so‘zlar insonlar e’tiborini jalb qilishga yordam beradi. PETA kompaniyasiga ko‘ra, loyiha charm sanoatining ona tabiatga dahshatli ta’siri haqida bilimlarni oshirishga qaratilgan. Tashkilotning vitse prezidenti Treysi Reyman shunday deydi:
“Biz odamlarni hayvonlar va atrof-muhitga zarar keltirmaydigan vegan materiallarni tanlashga chorlaymiz”.
Robot nafaqat charm buyumlar kiyganlarni tanqid qiladi, balki bunday tovarlarni xarid qilmaydigan shaxslarni maqtaydi ham: kimdir charmdan hech narsa sotib olmasligini aytsa, Charli XC raqsga tushadi va shu tarzda quvonchini ifodalaydi.
Izoh (0)