Buyuk Britaniyaning Uorikshir shahrida 250 ming dollarlik Range Rover o‘g‘irlab ketildi. Mashina egasi uni o‘g‘rilik sodir bo‘lishidan 60 soat avval xarid qilgan edi. Avtosalon esa unga Range Rover’ning aynan shu modeli ilg‘or xavfsizlik tizimiga ega ekanligiga ishontirgan.
Jon (familiyasini oshkor etishni istamagan) 2024-yil 13-dekabrda Buyuk Britaniyada ishlab chiqarilgan 550 ta modeldan biri bo‘lgan cheklangan tirajdagi Range Rover uchun hujjatlarni rasmiylashtirdi. Mashina uqalovchi o‘rindiqlar, 4D taktil audiotizim hamda yangilangan xavfsizlik tizimi bilan jihozlangan.
Ertasi kuni taxminan soat 15:30 da Jon avtoulovni avtosalondan olgan va 60 soatdan kamroq vaqt o‘tgach, mashina o‘g‘irlab ketilgan. Voqea 17-dekabr kuni erta tongda sodir bo'lgan. Kameralardagi videotasvirga ko‘ra, mashinani o‘g‘irlash uchun atigi 15 daqiqa kifoya bo‘lgan. Uni uch kishi qulfini 10 daqiqada buzgan va mashinaga o‘tirib ketgan.
Yangi Range Rover Jon xonadonining hovlisida qoldirilgan edi. Bezorilar mashinani qanday qilib haydab ketgani hozircha noma’lum.
O‘sha kuni Jon erta tong soat 3:00 da uyg‘ongan. Bu vaqtga qadar u mashinaga o‘rnatilgan trekerni kuzatuvchi kompaniyadan bir nechta qo‘ng‘iroqlarni o‘tkazib yuborgan. So‘ng Jon derazasidan qarab mashina yo‘qligini aniqlagan.
Natijada Jon Jaguar Land Rover bosh direktoriga shikoyat xati yozdi va mashinasining o‘g'irlanishi haqida ma’lumot berib, “eng so‘nggi texnologiyalarga asoslangan xavfsizlik tizimi” umuman ishlamasligi haqida shikoyat bildirdi.
JLR mijozlarga xizmat ko‘rsatish markazi uning xatiga quyidagicha javob berdi:
“Har bir mashinani mas’uliyat bilan ishlab chiqaruvchi sifatida biz shu kabi o‘g‘irliklarning oldini olish turli xavfsizlik tizimlarini joriy qildik. Biroq faqat ushbu tizimiga tayangan holda mashinadan foydalanish mumkin emas. Chunki avtotransport vositalarini o‘g‘irlash kabi jinoiy ishlar transport vositalari egalari duch kelishi bo‘lgan kundalik xavflardan biridir. Biz bunday holatda hech qanday javobgarlikni bo‘ynimizga olmaymiz va shikoyatingizni ko‘rib chiqmaymiz”.
Shu tariqda mashina ham topilmadi. Daily Mail nashri qayd etganidek, avtomashinalarni o‘g‘irlab, so‘ng ularni Afrika, Sharqiy Yevropa va Yaqin Sharqqa olib ketish kabi jinoyatlar Buyuk Britaniyada juda keng tarqalgan.
Izoh (0)