Los Anjeles shahri markazida o‘rta yoshli erkak avtomatik boshqariladigan robotaksini o‘g‘irlamoqchi bo‘ldi, biroq mashina bunga yo‘l bermadi. Bu haqda “Pravila jizni” xabar bermoqda.
Bezori erkak Jaguar I-PACE rusumli Waymo elektromobiliga minib, uni qo‘lda boshqarishga uringan, biroq tizim ruxsatnomasi yo‘q foydalanuvchi mashinaga chiqqanini aniqlagach, robotaksi eshiklari qulflangan va mashina politsiyaga qo‘ng‘iroq qilgan.
Avtomobil o‘g‘risi bir necha daqiqadan so‘ng qo‘lga olindi. Shahar politsiya xizmati ma’lumotlariga ko‘ra, hodisa vaqtida erkak mast holatda bo‘lgan.
Avtonom transport tizimlarini ishlab chiqaradigan Waymo kompaniyasi ta’kidlashicha, bu holat birinchi marta sodir bo‘lishi emas. Avtonom mashinalarni ruxsatsiz boshqarishga bir nechta urinishlar qilingan, ammo biror marta ushbu rusumli elektromobillar o‘g‘irlanmagan.
“Waymo mashinalari ruxsatnomasi yo‘q shaxslarning avtonom haydash tizimini bekor qilishiga va transport vositalarini qo‘lda boshqarishiga yo‘l qo‘ymaydi”, deyiladi kompaniya bayonotida.
Begona shaxs haydovchi o‘rindig‘iga o‘tirsa, Waymo’ning qo‘llab-quvvatlash tizimi undan transport vositasidan chiqib ketishni va so‘raydi. Agar ushbu talab bajarilmasa, sistema huquqni muhofaza qiluvchi idoralar bilan hamkorlikda ishlaydigan favqulodda vaziyat rejimini yoqadi va politsiya bilan bog‘lanadi.
Ma’lumot uchun: Waymo kompaniyasi bugungi kunda avtonom mashinalar texnologiyasini rivojlantirishda ilg‘or pozitsiyada, u o‘zining bir nechta eksperimentlari va sinov loyihalari orqali katta tajriba to‘pladi. Kompaniya bir necha yildan buyon avtonom robotaksilarni ma’lum hududlarda muvaffaqiyatli ishga tushirgan.
Waymo xizmatidan avval cheklangan miqdordagi shaxslar foydalanishi mumkin edi. Hozirda mazkur xizmatdan Los Anjeles, San Fransisko va Feniks shaharlari aholisi ham foydalanishi mumkin.
Waymo texnologiyasining asosiy komponentlari orasida sun’iy intellekt, sensor, Lidar (Light Detection and Ranging) texnologiyalari va boshqa ilg‘or tizimlar mavjud. Bu texnologiyalar avtonom robomashinalarning o‘z yo‘li bo‘ylab xavfsiz harakatlanishiga, atrof-muhitni tahlil qilishga va haydovchining o‘rnini to‘liq egallashga imkon beradi.
Izoh (0)