Londonda birinchi Ginnes rekordlari kitobi nashr etilganining 30 yilligi hamda Jahon rekordlar kuni nishonlana boshlaganining 20 yilligi munosabati bilan maxsus bayram bo‘lib o‘tdi. Savoy mehmonxonasida ikki rekordchilar uchun ingliz an’analariga xos choy marosimi tashkil qilindi. Unda dunyodagi eng baland bo‘yli va eng past bo‘yli ayollar uchrashdi.
Bugungi kunda sayyoramizdagi eng baland ayol turkiyalik 27 yoshli Rumeysa Gelgi hisoblanadi. U Ginnes rekordlari kitobiga 2021-yilda kiritilgan va mazkur unvonga ega bo‘lgan. Rumeysaning bo‘yi 215 sm. Unga kamyob kasallik — Uiver sindromi tashxisi qo‘yilgan. Kasallik tananing haddan ortiq tez o‘sishiga va suyak deformatsiyasiga olib keladi.
Butun dunyoda shunga o‘xshash anomal holatlardan yana 50 tasi ma’lum. Turkiyada bunday sindrom bilan og‘rigan odam faqatgina Gelgi hisoblanadi. Uning skeleti deformatsiyalangani sababli rekordchi nogironlar aravachasi orqali harakatlanadi. Oyoqqa turish uchun esa maxsus qo‘ltiqtayoqdan foydalanadi. Rumeysa uyda ta’lim olgan va hozirda veb-dizayner bo‘lib ishlaydi.
Dunyodagi eng kichik ayol hindistonlik 30 yoshli Joti Amji hisoblanadi. Uning bo‘yi 62 sm bo‘lib, bolaligida Jotiga axoyedroplaziya tashxisi qo‘yilgan. Rekordchining ovozi yosh qizchalarnikidek ingichka. U o‘zining noodatiy tashqi ko‘rinishi orqali mashhur bloger va aktrisaga aylangan.
Joti o‘zining boshqalarga o‘xshamasligidan qayg‘urmasligiga uning shifokor ota-onasi sababchi. U bolaligidan o‘ziga xos unikal inson ekanligiga ishongan va bu ishonch unga aktrisalik faoliyatini tanlashiga turtki bo‘lgan. Ijtimoiy tarmoq yulduziga aylangan Amji “American Horror Story” serialida suratga tushdi.
Londonda tashkil etilgan marosimda ikki rekordchi ayol bir-birini ko‘rishdan juda mamnun bo‘ldi.
“Men doim yuqoriga qarab odamlar bilan gaplashishga allaqachon odatlanib qolganman, lekin bugun boshimni ko‘tarib, dunyodagi eng baland ayolni uchratganimdan benihoyat xursand bo‘ldim”,
dedi Amji tabassum bilan.
“Ba’zida bo‘yimizdagi katta farq tufayli bir-birimizning ko‘zlarimizga qarash qiyin bo‘ldi, lekin bugungi uchrashuv juda ajoyib ruhda o‘tdi”,
dedi Gelgi.
Rumeysa va Joti Ginnes rekordlari kitobining ramziy belgisi bilan taqdirlandi. Shuningdek, ushbu maqtov belgisi sayyoradagi eng baland erkak — turkiyalik Sulton Kosen, eng uzun tirnoqli ayol — amerikalik Diana Armstrong kabilarga ham taqdim etildi.
Ginnesning rekordlar kitobi bosh muharriri Kreyg Glendey ham ushbu uchrashuvga tashrif buyurdi. Uning so‘zlariga ko‘ra, kitob insoniyatning turfa olamini noyob hodisa sifatida nishonlash uchun xizmat qiladi.
Izoh (0)