“Shrek” multfilmidagi Eshak obrazining prototipiga aylangan Perri laqabli eshak AQSHning Kaliforniya shtatida vafot etdi. Uning o‘limi 2-yanvar kuni Palo Altodagi eshaklarga g‘amxo‘rlik qiluvchi Barron Park Donkey Project tomonidan e’lon qilindi. Perri 30 yoshdan oshgan edi.
Hayvon laminit — tuyoqlar yallig‘lanishidan aziyat chekar edi, shu sababli uzoq vaqt davomida kurashib kelayotgan og‘riqdan xalos qilish uchun Perri bir umrga uxlatib qo‘yildi. U 1997-yildan beri Palo Alto shahridagi eshaklar boshpanasida yashab kelayotgan edi.
“Qariyb bir oy davomida Perri uch oyoqda harakat qilar va doimo bir oyog‘ini ko‘targan holda turar edi. Eshaka ko‘p marta kuchli og‘riq qoldiruvchi dorilar berilgan” dedi hayvonlar boshpanasi xodimi Jenni Kiratli.
Og‘riqni yengillashtirish uchun Perriga iliq massajlar qilingan, lazer terapiyasi va igna sanchish usulidan foydalanilgan. Yil boshida esa uning holati yaxshilanmayotgani ma’lum bo‘lgan.
“Uzoq umri davomida Perri filmdagi so‘zlovchi Eshak obraziga qo‘shgan hissasi orqali mahalliy hamjamiyat va boshqa ko‘pchilikning qalbini zabt etdi”, deyiladi Barron Park Donkey Project bayonotida.
Perrining 30 yoshga to‘lishi munosabati bilan eshaklarga g‘amxo‘rlik qiluvchi parkka ko‘plab odamlar, jumladan, Palo Alto shahri meri Grir Stoun hamda boshqa siyosatchilar tashrif buyurgan. Shuningdek, mahalliy hokimiyat hayvonning tibbiy xarajatlari uchun 10 ming dollar ajratgan.
Perri nafaqat quvnoq va qiziqarli hayvon ekani, balki “Shrek” multfilmidagi Eshak obrazi prototipi sifatida ham tanilgan edi. Ushbu qahramonga aktyor Eddi Myorfi ovoz bergan.
Eslatib o‘tamiz, XXI asrning eng nufuzli va taniqli animatsion franshizalaridan biri bo‘lgan “Shrek” filmida Eshak obrazi eng esda qolarli qahramonlardan biriga aylangan. Franshizaning beshinchi qismi 2025-yilda chiqishi ham mumkin, bu haqda aktyor Eddi Myorfi Collider nashriga bergan intervyusida Eshak obraziga qayta ovoz berishi haqida ham to‘xtalib o‘tgan edi.
Izoh (0)