Qo‘shma Shtatlarda suratga olingan film va seriallarda kir yuvish uchun maxsus markazlarni ko‘rishingiz mumkin. Amerikada kir yuvish va quritish joylari (“laundromats” yoki “coin laundries”) juda keng tarqalgan bo‘lib, aholining katta qismi undan foydalanadi. Ular odatda kvartirasida kir yuvish mashinalari yo‘q yoki kichik bo‘lgan odamlar uchun qulay. Bu odat qayerdan paydo bo‘lgan va nega aholi kir yuvish mashinalaridan uyda foydalanmaydi?
Kir yuvish mashinasi uchun uyda joy va sharoit yo‘q
Ko‘plab Amerika kvartiralarida, ayniqsa, yirik shaharlarda, kir yuvish mashinasi uchun alohida joy ajratilmaydi. Bu uy-joyning dizayni bilan bog‘liq: eski uylarda kir mashina uchun alohida suv quvuri o‘tkazish qimmatga tushadi.
Kommunal chiqimlarni tejash
AQSHda suv va elektr energiyasining narxi yuqori bo‘lgani tufayli kir yuvish markazlari pulni tejash imkonini beradi: bu yerda kir mashinasini har bir yuklaganlik uchun pul to‘lanadi. Bundan tashqari, umumiy kir yuvish xonalari suv va elektr energiyasidan maishiy mashinalarga qaraganda tejamkorroq foydalanadi.
Boshqa tomondan, ijaraga beruvchi ba’zi shaxslar uyda kir yuvish mashinasi o‘rnatishni taqiqlaydi, chunki uy egalari suv toshishi va elektr tokida qisqa tutashuvlar sodir bo‘lishidan xavotir oladi.
Bir makonda muqim qolmaslik madaniyati
Amerikaliklar tez-tez uy-joyini almashtiradi, shuning uchun kir yuvish mashinasi yoki quritgich kabi katta texnikalarni sotib olish va tashish keraksiz muammo sifatida qabul qilinadi. Kir yuvish markazlari esa vaqtinchalik yashaydiganlar uchun qulaylik yaratadi.
Kir yuvish markazlari qanday tashkil etilgan?
O‘z-o‘ziga xizmat ko'rsatish: Odamlar o‘z kirlarini olib kelib, mashina va quritgichlarni ishlatishadi. Kir mashinalar odatda tangalar yoki kartalar bilan ishlaydi.
To‘liq xizmat: Ba’zi markazlar yuvish, quritish va hatto dazmollash xizmatlarini ham taklif qiladi. Bu esa qo‘shimcha haq evaziga amalga oshiriladi.
Quritish xizmati: Ba’zi kir yuvish markazlari professional tozalash (dry cleaning) xizmatlarini ham taqdim etadi.
Imkoniyatlar
Zamonaviy kirxonalari ko‘pincha Wi-Fi, kofe va yegulik avtomatlari va hatto bolalar uchun o‘yin maydonchalari bilan jihozlangan. Barchasi foydalanuvchilar vaqtni maroqli o‘tkazishiga yordam beradi. Odatga ko‘ra, kir yuvish markazlari asosan ko‘p qavatli uylarning yerosti qavatida yoki supermarketlarga yaqin joylarda joylashgan bo‘ladi.
Texnika narxi
O‘zbekistonda sotiladigan kir yuvish mashinalari aholi uchun qulay narxlarda, ammo AQSHda bunday maishiy texnika qimmat qulaylikdir.
Quritish mashinalaridan foydalanish an’anasi
Amerika madaniyatiga ko‘ra, kiyimlar dorga osib quritilmaydi. Aksariyat aholi elektr quritgichlar yoki quritish mashinalarini afzal ko‘radi, chunki ular kiyimlarni tez va samarali quritish imkonini beradi. Uyda quritgichni o‘rnatish qo‘shimcha ventilyatsion tizim ishlab chiqishni talab qiladi, shu sababli aholi kir yuvish markazlariga borishni ma’qul ko‘radi.
Ijtimoiy norma
Ko‘pgina amerikaliklar uchun kir yuvish markazlariga borish odatiy hol bo‘lib, bu jarayon noqulaylik sifatida qabul qilinmaydi. Aksincha, kiyimlaringiz yuvilayotganda dam olish, kitob o‘qish, muloqot qilish yoki hatto noutbukda ishlash uchun qulay bo‘lishi mumkin. Sotsiologlarning fikricha, bu amerikaliklar uchun doimiy tashvishlardan dam olish va meditatsiya qilish joyi ham hisoblanadi.
Izoh (0)