Apple Machine Learning Research saytida chiroq shaklidagi stol lampasini ishlab chiqishga haqidagi kichik tadqiqot maqolasi nashr etildi. Apple mahsulotlari va dasturiy ta’minoti haqida eng so‘nggi yangiliklar va tahlillarni yoritadigan MacRumors ma’lumotlariga ko‘ra, robot-lampaning ikkita prototipi mavjud: biri “funksional” va ikkinchisi “hissiyotli” lampadir. Ikkisi ham ovozli buyruqlar va imo-ishoralarga javob beradi, lekin ikkinchisi o‘zini Pixar studiyasining belgisi kabi tutadi: u tanasini egib, raqsga tushadi, turli hissiyotlarni ifodalaydi.
Shuningdek, sun’iy intellekt o‘rnatilgan ushbu lampadan ob-havo haqida so‘ralganda, u javob berishdan avval birinchi navbatda derazadan tashqariga qaraydi. Lampa bilan ishlaganda u o‘z chirog‘ini avtomatik ravishda kerakli burchakka taratadi va joyini o‘zgartiradi. Agar unga suv olib kelish buyurilsa, u stoldagi stakanni ohista itaradi. Qiziqarlisi, agar u bilan sayrga chiqishdan bosh tortsangiz, bundan xafa bo‘ladi va g‘amginlikni ifodalagandek, tanasini pastga egadi.
Tadqiqotchilar ta’kidlashicha, insonlar bilan samarali muloqot qilish uchun robotlar shunchaki buyruqlarni bajarishdan tashqari foydalanuvchilarga odamlar kabi hissiyotlar ifodalashi ham muhim.
Apple yaqin kelajakda ushbu lampalarni ishlab chiqarish masalasi hozircha noma’lum, biroq Bloomberg nashri avvalroq Apple’ning uy uchun robot qurilmalar ustida ishlayotgani haqida xabar bergan edi. Ana shunday gadjetlardan biri aqlli uyning markaziga aylanishi mumkin bo‘lgan kamerali shaxsiy yordamchi bo‘lishi haqida mish-mishlar tarqalmoqda. Uning ishla chiqarilishi 2026-2027-yillarda kutilmoqda va narxi ming dollar atrofida bo‘lishi taxmin qilinmoqda.
Ushbu tadqiqot Apple kompaniyasi nafaqat funksionallikka, balki texnikalarning hissiyotli bo‘lishiga ham e’tibor qaratayotganini tasdiqlaydi. Ehtimol, kelajakda kompaniyaga tegishli uy robotlari nafaqat kundalik hayotimizni yengillashtirishi, balki foydalanuvchilar bilan yanada jonli muloqot qilish imkonini yaratishi mumkin.
Izoh (0)