Farzand tug‘ilishi bilan oila a’zolarining hayoti tubdan o‘zgarib ketadi. Uyga kelgan jajji mehmon ko‘p jihatdan ayolning hayotini murakkablashtiradi. Odatiy kun tartibi, ovqatlanish qoidalaridan tortib barcha odatlar o‘zgaradi. Bunday vaziyatda ota-onalar hayotini yengillashtiradigan turli gadjetlar, uskunalar va mebellar yordamga keladi.
Butilka sterilizatori
Chaqaloqlarni ovqatlantirish uchun mo‘ljallangan shisha yoki plastik butilkalarni doim qaynatilgan suv bilan yuvishga vaqt topilmasligi mumkin. Bunday holatda onalarga maxsus sterilizator yordam beradi. U nafaqat chaqaloq idishlarini yuvadi va tozalaydi, balki sutni isitish funksiyasiga ham ega. Sterilizatorni yoqilgan holatda qoldirib ketishdan xavotir olmasangiz ham bo‘ladi, ishlab bo‘lgach, gadjet avtomatik ravishda o‘chadi.
Monitorli video-enaga
Onalar o‘zlariga biroz vaqt ajratish kerak bo‘lganda va chaqaloqni tashlab ketishga hech kim bo‘lmaganda monitorli video-enaga yordamga keladi. Kamera bolaning yonida o‘rnatiladi. Shunda boshqa xonadan ekran orqali chaqaloq ahvolini kuzatib turish mumkin.
Nakleyka ko‘rinishidagi termometr
Afsuski, yosh bolalar turli viruslardan himoyalanmagan bo‘ladi va kasal bo‘lib turadi. Chaqaloq tana haroratini tez-tez o‘lchash zarurati tug‘ilganda noqulay simobli termometr o‘rniga nakleyka ko‘rinishidagi termometrdan foydalanish mumkin. Ular bolaning peshona qismiga yopishtiriladi. Nakleyka 35 darajadan 40 darajagacha bo‘lgan haroratni ko‘rsatadi.
O‘yinchoqlarni saqlash uchun gilam-qop
Bolali uy bozor deganlaridek, yosh bolalar bor xonadonda albatta o‘yinchoqlar sochilib ketishi tabiiy holat. Ularni kuniga bir necha marta qayta yig‘ish va yoyishga vaqtni zoye ketkazmalik uchun gilam shaklidagi maxsus qoplardan foydalanish mumkin. Diametri 1,4 metr bo‘lgan gilamcha ustida bola o‘ynab bo‘lgach, uning uchlaridagi iplar tortiladi va barcha o‘yinchoqlar qop ichida qoladi.
Sayr uchun bolalar kishani
Ko‘rinishidan ushbu kashfiyot qo‘pol tuyulsada, gavjum joyga bolalar bilan tashrif buyurishni osonlashtiradi. Ayniqsa, sayr vaqtida ota-ona qo‘lini ushlashni yoqtirmaydigan, doim turli tomonlarga yugurib ketadigan sho‘x bolalar uchun ushbu kishan asqatadi. Kishanning bir tomoni onaga, ikkinchi qismi esa bolaning qo‘liga taqiladi.
Bolalar ratsiyasi
Maktabgacha yoshdagi bolalar bilan sayohat qilganda, velosiped, samokat bilan sayr qilganda yoki berkinishni taqozo qiladigan o‘yinlar o‘ynaganda ushbu gadjet kerak bo‘ladi. Endilikda bola ko‘zdan g‘oyib bo‘lganda uni topish uchun baland ovozda chaqirish shart emas. Ratsiya farzandingiz bilan doim aloqada qolishga yordam beradi. Devays batareykalar bilan ishlaydi va uch kilometrgacha bo‘lgan masofada signallarni qabul qiladi.
Bolalar uchun aqlli soatlar
Maktab o‘quvchilari, balog‘at yoshidagi bolalarni qayerda ekanini bilish va ular bilan doimiy aloqada bo‘lish uchun aqlli soatlardan foydalanish mumkin. Qurilmada video va audio aloqa mavjud va smartfonga ulanmasdan ishlaydi, soatga ikkinchi SIM-kartani ham ulash mumkin. Unda bolaning qayerda ekanini nazorat qilish mumkin bo‘lgan GPS funksiyasi ayni keraklidir.
Kir quritish mashinasi
Kir yuvish mashinasi kiyimlaringizni tozalab bersa, quritish mashinasi ularni uyda yoki ko‘chada yoyib quritish tashvishidan qutqaradi. Bu mashinalar barabanining materialiga (plastik yoki metall) ko‘ra, qo‘shimcha funksiyalari, maxsus dasturlari, bolalardan va himoyasi mavjudligiga ko‘ra farqlanadi.
Ushbu texnika, ayniqsa, serfarzand xonadonlarda — muntazam tarzda va ko‘p miqdorda kir yuvishga to‘g‘ri keladigan bo‘lsa juda asqatadi. Shuningdek, bir qator quritish mashinalari kiyimni bug‘ yordamida zararsizlantirish funksiyasi ega: bunda viruslar, bakteriyalar va kasallik keltirib chiqaruvchi boshqa mikroorganizmlar yo‘q qilinadi. Ularni boshqa maqsadlarda, masalan, bolalarning yumshoq o‘yinchoqlarini tozalash, kundalik kiyiladigan kiyimlarni yengil tozalash uchun ham qo‘llasa bo‘ladi. Shuningdek, quritish mashinasi bor xonadonda chang kam bo‘ladi.
Izoh (0)