Apple Маchine Learning Research сайтида чироқ шаклидаги стол лампасини ишлаб чиқишга ҳақидаги кичик тадқиқот мақоласи нашр этилди. Apple маҳсулотлари ва дастурий таъминоти ҳақида энг сўнгги янгиликлар ва таҳлилларни ёритадиган МаcRumors маълумотларига кўра, робот-лампанинг иккита прототипи мавжуд: бири “функсионал” ва иккинчиси “ҳиссиётли” лампадир. Иккиси ҳам овозли буйруқлар ва имо-ишораларга жавоб беради, лекин иккинчиси ўзини Pixar студиясининг белгиси каби тутади: у танасини эгиб, рақсга тушади, турли ҳиссиётларни ифодалайди.
Шунингдек, сунъий интеллект ўрнатилган ушбу лампадан об-ҳаво ҳақида сўралганда, у жавоб беришдан аввал биринчи навбатда деразадан ташқарига қарайди. Лампа билан ишлаганда у ўз чироғини автоматик равишда керакли бурчакка таратади ва жойини ўзгартиради. Агар унга сув олиб келиш буюрилса, у столдаги стаканни оҳиста итаради. Қизиқарлиси, агар у билан сайрга чиқишдан бош торцангиз, бундан хафа бўлади ва ғамгинликни ифодалагандек, танасини пастга эгади.
Тадқиқотчилар таъкидлашича, инсонлар билан самарали мулоқот қилиш учун роботлар шунчаки буйруқларни бажаришдан ташқари фойдаланувчиларга одамлар каби ҳиссиётлар ифодалаши ҳам муҳим.
Apple яқин келажакда ушбу лампаларни ишлаб чиқариш масаласи ҳозирча номаълум, бироқ Bloomberg нашри аввалроқ Apple’нинг уй учун робот қурилмалар устида ишлаётгани ҳақида хабар берган эди. Ана шундай гаджетлардан бири ақлли уйнинг марказига айланиши мумкин бўлган камерали шахсий ёрдамчи бўлиши ҳақида миш-мишлар тарқалмоқда. Унинг ишла чиқарилиши 2026-2027 йилларда кутилмоқда ва нархи минг доллар атрофида бўлиши тахмин қилинмоқда.
Ушбу тадқиқот Apple компанияси нафақат функсионалликка, балки техникаларнинг ҳиссиётли бўлишига ҳам эътибор қаратаётганини тасдиқлайди. Эҳтимол, келажакда компанияга тегишли уй роботлари нафақат кундалик ҳаётимизни енгиллаштириши, балки фойдаланувчилар билан янада жонли мулоқот қилиш имконини яратиши мумкин.
Изоҳ (0)