Bolalarga mos keladigan telefon tanlash oson ish emas. Ko‘plab omillarni hisobga olish kerak: qurilma ishonchli bo‘lishi, qo‘ldan tushib ketishlarga va suvga chidamli bo‘lishi, samarali va xavfsiz bo‘lishi kerak. Bundan tashqari, telefon juda qimmat bo‘lmasligi lozim, chunki bolalar gadjetlarini ko‘pincha yo‘qotib qo‘yishadi. Biz ushbu talablarning aksariyatiga javob beradigan telefonlar ro‘yxatini tuzishga qaror qildik.
Google Pixel 7 Pro
Ushbu modelni o‘smirlarga sovg‘a sifatida berish mumkin. Telefonning dizayni qiziqarli, kamerasi a’lo, batareyasi kun davomida ishlashga chidaydi, ekrani esa yorqin quyosh nurlariga chidamli. Google Pixel 7 Pro mobil telefonlari namlik va changdan himoyalangan. Telefon to‘liq suv o‘tkazmaydi. Agar korpusda yoriqlar va tirnalishlar bo‘lmasa, uni 1,5 metrgacha chuqurlikka tushirish mumkin. Biroq qurilma juda qo‘pol, bu barcha bolalarga ham yoqmaydi.
Samsung Galaxy A15 5G
Ehtiyotkorlik bilan foydalanilganda bu model bir necha yil xizmat qilishi mumkin. Qurilma ajoyib ekran va yaxshi prosessor, shuningdek, microSD kartalar uchun slotga ega. Bundan tashqari, telefonning yetarlicha sig‘imli akkumulyatori va yaxshi kamerasi ham bor. Kamchiliklarga plastik korpus va suvdan himoyalanishning yo‘qligini kiritish mumkin.
Apple iPhone SE (2022)
Ushbu modelni iPhone liniyasidagi eng arzon yangi telefonlar qatoriga kiritish mumkin. Agar ota-onalar ushbu kompaniyaning qurilmalaridan foydalansa, bunday xarid yaxshi yechim bo‘ladi, chunki iPhone SE Apple’ning turli xizmatlariga ulanishi mumkin. Telefonning kamerasi zamonaviy modellar bilan solishtirganda unchalik emas, ekrani ham kichikroq bo‘lib ko‘rinishi mumkin. Ammo model kichik bolalarning qo‘llari uchun juda mos keladi. Bundan tashqari, bolaning qurilma ekrani oldida o‘tkazgan vaqtini kuzatish, shuningdek, telefon hozir qayerdaligini tekshirish mumkin.
OnePlus Nord N30 SE
Mutaxassislarning fikriga ko‘ra, ushbu model eng yaxshi byudjetli mobil telefonlardan biri hisoblanadi. Qurilma yuqori aniqlikdagi yaxshi kamera, a’lo darajadagi ish unumdorligi va sifatli tasvirni uzatuvchi keng ekranga ega. Bundan tashqari, telefonda kuchli dinamika mavjud — suhbatdoshning har bir so‘zi hatto shovqinli xonada ham aniq eshitiladi. Qurilmaning yana bir afzalligi — u tez zaryadlanadi (atigi 55 daqiqada 0% dan 100% gacha).
HONOR X7a Plus
Ushbu modelni bolaga birinchi smartfon sifatida sotib olish mumkin. Telefon arzon va mobil o‘yinlar uchun unchalik mos kelmaydi. Lekin kamerasi yomon emas, ekrani katta va protsessorlari yaxshi. Ishlab chiqaruvchilarning ta’kidlashicha, HONOR X7a Plus 3 kun davomida quvvatsiz ishlashi mumkin. Bundan tashqari, u yetarlicha tez zaryadlanadi.
Vivo Y27
O‘smirga bu model juda oddiy tuyulishi mumkin, ammo bolalarga juda mos keladi. Telefon qulay va tushunarli interfeysga ega, shuning uchun hatto kichik foydalanuvchi ham sozlamalarni bajara oladi. U faol ishlatilganda ham kun davomida quvvatni saqlaydi. Qurilma yetarli darajada kuchli protsessor bilan jihozlangan, bu bir vaqtning o‘zida bir nechta vazifalarni bajarish imkonini beradi. Bundan tashqari, telefon chang va namlikdan himoya qiladi.
Blackview BV9300 Pro
Maxsus korpus smartfonni chang va namlik ta’siridan ishonchli himoya qiladi, yuqoridagi modellar orasida eng yuqori himoya darajasiga ega. Shuning uchun ham telefonning og‘irligi 500 grammdan oshadi.
Telefon katta sig‘imli akkumulyator, yaxshi kamera va displey bilan jihozlangan. Blackview BV9300 Pro juda katta xotiraga ega. Minuslariga quloqchinlar uchun rozetkaning yo‘qligini kiritish mumkin.
Redmi Note 12
Redmi Note 12 ning eng yaxshi xususiyatlaridan biri ekrani hisoblanadi. Model AMOLED displey bilan jihozlangan bo‘lib, u yanada sifatli va kontrastli tasvirni ko‘rsatadi, shu bilan birga ko‘z uchun tejamkor rejimda ishlaydi. Bolalar tez-tez smartfonlardan foydalanishini hisobga olsak, bu katta afzallik. Istasangiz, displey rang gammasini o‘zgartirishingiz mumkin. Telefon akkumulyatori 16 soat ishlashga mo‘ljallangan. To‘g‘ri, qurilmani tezda zaryadlash bir soatdan ko‘proq vaqt oladi. Telefonning yana bir kamchiligi — eskirgan dasturiy ta’minotidir.
Izoh (0)