9-avgust kuni bo‘lib o‘tgan D23 Fan Expo ko‘rgazmasida Disney kompaniyasi Pixar “Super oila-3” ustida ish boshlaganini e’lon qildi. Multfilmni dastlabki ikki qismning ssenariy muallifi va rejissyori bo‘lgan Bred Byord suratga oladi.
Shu bilan birga, ushbu ko‘rgazmada yaqin yillarda katta ekranlarda namoyish etiladigan boshqa loyihalar ham taqdim etildi. Jumladan, “Mufasa: qirol sher” filmining katta treyleri ko‘rsatildi.
Taqdimotni aktyor Dueyn Jonson va Aulya Kravalyolar ochib berishdi. Ular “Moana” multfilmining bosh qahramonlariga ovoz berishgan. Aktyorlar animatsion filmning davomi 27-noyabrda chiqishini e’lon qildi:
“Lilo va Stitch” kino adaptatsiyasining premyerasi 2025-yilning yoz faslida bo‘lib o‘tadi. Bosh rolni Maya Kiloa ijro etgan. Zak Galifianakis Jamba obraziga va Billi Magnussen Pikli obraziga ovoz bergan.
“O‘yinchoqlar tarixi-5”ga kelsak, filmni avvalgi barcha qismlarning ssenariy muallifi va “Nemoni izlab” filmi rejissyori Endryu Stenton suratga oladi. Multfilmdagi gadjetlar va zamonaviy texnologiyalar yovuz qahramonlar roliga kiradi. Franshizaning yangi qismi 2026-yilning yozida namoyish etilishi rejalashtirilgan.
Shuningdek, Pixar studiyasi o‘zining “G‘alaba yo mag‘lubiyat” deb nomlangan ilk seriali ustida ish boshlaganini e’lon qildi. Uning premyerasi 6-dekabrga belgilangan.
Yana bir ko‘p qismli serial muvaffaqiyatli “Boshqotirma” loyihasi asosida suratga olinadi va “Tushlar studiyasi” (Dream productions) deb ataladi. Unda Raylining har kecha ro‘yobga chiqadigan tushlari haqida hikoya qilinadi. Insayderlar ma’lumotiga ko‘ra, serial 2025-yilning bahorida chiqishi kutilmoqda. “Muzyurak-3” animatsion filmining premyerasi esa 2027-yilga mo‘ljallangan.
Bundan tashqari, ko‘rgazmada “Oppog‘oy” filmi yangi talqinining birinchi tizeri ham namoyish etildi, unda Reychel Zegler bosh qahramon, Gal Gadot esa yovuz ayol rolini ijro netadi. Film premyerasi 2025-yil 21-martda bo‘lib o‘tadi.
Keyingi yilda yangi va original multfilmlar premyerasi ham bo‘lib o‘tadi. 2026-yilda “Hoppers” animatsion filmi chiqadi. Unda robot qunduz ichiga kirib qolgan va hayvonlar dunyosini noodatiy tarzda o‘rganadigan qiz haqida hikoya qilinadi.
Shuningdek, “Yulduzlar jangi: Asosiy jamoa” serialining treyleri ham taqdim etildi. Shou premyerasi 3-dekabr kuni Disney+ da bo‘lib o‘tadi.
Izoh (0)