Uy va ish joylarini toza saqlash nafaqat estetik jihatdan muhim, balki sog‘liq uchun ham katta ahamiyatga ega. Chang, allergenlar va kir uy muhitini ifloslantirib, turli kasalliklarga sabab bo‘ladi. Shu sababli tozalash jarayonini osonlashtiruvchi va samarali vositalardan biri — changyutgich bugungi kunda deyarli har bir uyda ishlatiladi. Ammo shunday yumushlar borki, ularni changyutgich yordamida bajarish texnikaning buzilishiga olib keladi.
Changyutgich orqali nimalarni tozalash mumkin emas?
Shisha siniqlari
Ushbu punkt bejizga birinchi o‘ringa qo‘yilmadi. Agar quyidagi ro‘yxatdan hech bo‘lmasa bittasi yodingizda qolsa, u ham bo‘lsa shisha va oyna siniqlari bo‘lishi lozim. Changyutgichda ularni tozalasak, shlang yirtilishi, mayda bo‘laklar esa qopni teshishi mumkin. Shuningdek, shisha siniqlari motor ichiga tushsa, changyutgich tez orada yaroqsiz holatga keladi.
Yerga to‘kilgan suv
Bunday holda “hammomda sochlarni fenda quritmaslik lozim” qoidasi qo‘llaniladi: hech qachon elektr jihozlariga suv tegmasligi lozim (aynan nam tozalash uchun mo‘ljallangan gadjetlar bundan mustasno).
Nam gilam
Changyutgichda nam gilam ustini tozalashdan avval uni yaxshilab qurishiga ahamiyat bering. Gilamdagi suv tomchilari texnikani ishdan chiqarmaydi, lekin uning ichida namlik to‘planishiga, mog‘orlashishiga, u yerda esa chang va sochlar yopishishiga sabab bo‘ladi. Natijada changyutgich yaxshi tortmay qo‘yadi.
Poroshok yoki soda kukuni
Ehtimol, internetda ushbu layfhakni ko‘rgan bo‘lsangiz kerak: ba’zilar gilam ustiga soda yoki poroshok sepib, so‘ng ustidan changyutgich bilan yurishni tavsiya qiladi. Shu orqali gilam dezinfeksiya bo‘ladi, deb uqtiriladi. Ammo bu tavsiyani amalda sinab ko‘rib, changyutgichsiz qolib ketishingiz mumkin — katta miqdordagi poroshok va iste’mol sodasi bir zumda qurilma filtrlariga tiqilib qoladi va texnikani ishdan chiqaradi.
Pudra va ko‘z tenlari
Yerga tushib ketib, singan kosmetikani nam supurgi bilan tozalash lozim, aks holda ko‘z tenining rangi barcha yerga surkalib, yerda dog‘lar qoldiradi.
Kul va ko‘mir
Agar uy sharoitida kalyan ishlatilgach, ko‘mirni changyutgichda tozalamoqchi bo‘lsangiz, adashasiz. Ko‘mirning yuqori harorati chang to‘planadigan qopchani yondirib yuborishi va yong‘inga olib kelishi mumkin.
Qurilish materiallaridan qolgan chang
Uyni ta’mirdan o‘tkazish vaqtida juda katta miqdorda chang to‘planadi. Ammo uni faqatgina supurgi yordamida tozalash mumkin, aks holda qurilish materiallari texnikani ishdan chiqaradi. Bunga sabab — qurilish materiallaridagi kichik zarralar qopcha va filtr ichida to‘planib qolishida.
Katta miqdordagi soch yoki mo‘yna
Changyutgichlar gilamga tushgan soch va mo‘ynani yig‘ish uchun mo‘ljallangan bo‘ladi, ammo katta miqdordagi soch filtr va cho‘tkalarda to‘planib qolishi mumkin.
Izoh (0)