ASUS kompaniyasi Anna Sui parfyumeriya brendi bilan hamkorlikda xushbo‘y hid taratadigan noodatiy qurilma — Adolbook 14 Air nomli yangi noutbukni ishlab chiqdi.
Noutbuk qopqog‘ining markaziy qismiga maxsus dozator o‘rnatilgan bo‘lib, u gadjetga magnit yordamida yopishtiriladi, bu esa kartridjlarni almashtirishda qiyinchilik tug‘dirmaydi.
Och siyohrang tusda ishlangan Adolbook 14 Air xarid qilsangiz, qo‘shimcha sifatida rezavorlar, sitruslar va atirgullarning xushbo‘y hidini taratuvchi parfyumdan iborat dozator, zamonaviy sichqoncha, noutbukni saqlash uchun sumka va stikerlar beriladi. Bundan tashqari, bir flakon Wishing Elf Parfume atiri ham sovg‘a qilinadi.
Adolbook 14 Air texnik nuqtayi nazardan ham yaxshi parametrlarga ega. Noutbuk 2880x1800 pikselli va 14 dyuymli OLED panelga ega. Uning akkumulyator quvvati 14 soat davomida to‘xtovsiz video tomosha qilish uchun yetarlidir. Noutbuk operativ xotirasi 32 GB, doimiy xotirasi esa 1 terabaytni tashkil etadi. Adolbook 14 Air’ning narxi 6999 yuan (taxminan 975 dollar).
Izoh (0)