Nima uchun robot changyutgichlar qo‘lda tozalashning o‘rnini bosa olmaydi?

Robot changyutgich — polni avtomatik ravishda tozalashga mo‘ljallangan elektron qurilma bo‘lib, sensorlar yordamida xonalarni skanerlash, tozalash jarayonini rejalashtirish va uyda to‘plangan chang va boshqa iflosliklarni tozalash vazifasini bajaradi. Robot changyutgichlarning aksariyati maxsus ilovalar orqali boshqariladi va foydalanuvchilarga vaqtni tejash imkonini beradi.

Bugungi kunda robot changyutgichlarning xilma-xil variantlari, jumladan, quruq tozalash va nam tozalash funksiyalariga ega turlari mavjud. Bunday gadjetlar kundalik supurish va pollarni artish vazifasini o‘z zimmasiga oladi va tozalikni doimiy saqlab turishda yordam beradi.

Biroq robot changyutgichlarga barcha ishni topshirib qo‘yish yaramaydi, chunki ular qo‘lda o‘zimiz tozalagandek uylarni saranjom qilmaydi. Quyida ushbu gadjetlarning imkoniyatlari va ularni qo‘llashdagi muammolarni batafsil ko‘rib chiqamiz.

To‘siqlar va mebellar

Arzonroq versiyadagi robot changyutgichlar 2 sm balandlikdagi eshik ostonasidan o‘ta olmaydi yoki televizor ostidagi mebel tagini tozalay olmaydi. Ammo yaqin kelajakda bu muammo o‘z yechimini topishi mumkin: CES-2025 texnologiyalar ko‘rgazmasiga Roborock Saros 10 va Dreame X50 Ultra rusumli ikkita yangi robot changyutgichlar olib kelindi, ular liDAR funksiyasi orqali tor joylardan o‘tish imkoniyatiga ega bo‘ladi hamda maxsus oyoq mexanizmi bilan 2 sm va 4 sm balandlikdagi ostonalardan o‘ta oladi.

Devor burchaklari va xonaning chekka qismlari

Hozirgi ishlab chiqariladigan robot changyutgichlarning aksariyati doira shaklida, chunki u turli joyda oson harakatlanish imkonini beradi. Ammo plintuslar va burchaklarni yaxshi tozalamaydi.

Garchi keng tarqalgan bo‘lmasa ham, kvadrat yoki D-shaklidagi modellar ham mavjud. Ular burchaklarni yaxshi tozalaydi, lekin buning uchun stullarni ko‘tarish yoki boshqa joyga olib qo‘yish qo‘yish kerak bo‘ladi.

Bundan tashqari, kuchli oqim bilan burchakdagi changni tortadigan yon tomonida cho‘tkalar o‘rnatilgan changyutgichlar ham mavjud. Ular korpusdan ajralib, kerakli joylarga yetib boradi va kichik burchaklarni ham yaxshi tozalaydi. Bunday texnologiyalar Roborock, Dreame, Ecovacs va iRobot kabi ishlab chiqaruvchilarda mavjud.

Qotib qolgan dog‘lar

Nam tozalash funksiyali robot changyutgichlar, odatda, uylarni faqat chang va axlatdan tozalash bilan cheklanmay, nam yuvish imkoniyatini beradi. Bunday robot changyutgichlarda maxsus suvni saqlovchi konteyner va mikrofibrali mato bilan ishlaydigan yuvish paneli mavjud. Ammo u qotib qolgan va eski dog‘larni tozalab bermaydi.

Gilamlarni tozalash

Robot changyutgichlar standart changyutgichlarga qaraganda so‘rib olish energiyasi ancha kamroq. Bu esa quyidagi muammolarga sabab bo‘ladi:

• Tozalash uchun kuch yetishmasligi: Robot changyutgichlar, ayniqsa, qalin gilam ustidagi chang va iflosliklarni samarali yig‘ib olmaydi;.
• Sensorlarning adashishi: Gilamning turini aniqlashda robot changyutgichlarning sensorlari ba’zan noto‘g‘ri ishlashi mumkin

Robot changyutgichlar samaradorligini qanday oshirish mumkin?

Eng oddiy maslahat mazkur texnikaning eng zamonaviy va quvvati baland modelini sotib olishdir. Ularning bir nechta afzalliklari bo‘lib, tozalash ishlarini ancha osonlashtiradi va samarali bo‘lishiga xizmat qiladi. Jumladan, Zamonaviy flagman robot changyutgichlar kuchli motor va innovatsion yutish texnologiyalari bilan jihozlangan bo‘ladi. shuningdek ular avtomatik tarzda turli rejimlarni sozlash imkoniyatiga ega bo‘lib, chiqindilarni avtomatik yig‘adi, filtrni tozalaydi va bir oyda bir martagina filtrni qo‘lda almashtirish imkonini beradi.

Shuningdek, robot changutgichning samaradorligini oshirish uchun quyidagi tavsiyalar foydali bo‘lishi mumkin:

• Rejimlarni to‘g‘ri tanlash: Har bir xonada turli rejimlar bo‘lishi mumkin. Misol uchun, yuqori rejimni faqat kir ko‘p bo‘lgan hududlarda ishlatish, energiya sarfini kamaytiradi va samaradorlikni oshiradi.
• Tozalanadigan joylarni to‘g‘ri tayyorlash: Agar yerda turli to‘siqlar yoki kabellar bo‘lsa, robotning harakatini cheklab qo‘ymaslik uchun ularni oldindan olib tashlang.
• Qurilmani muntazam tozalash: Robotda to‘plangan changni tozalash ichini tekshirib turish juda muhim.
• Batareyani to‘g‘ri ishlatish: Robotning batareyasini to‘liq zaryad olgach, uni olib tashlash muhim.
• Kundalik jadvalni sozlash: Agar siz robotni aniq vaqtlar bo‘yicha ishga tushirishni xohlasangiz, uning ish jadvalini yaratish mumkin. Bu, ayniqsa, har kuni bir xil vaqtda tozalash zarur bo‘lgan joylar uchun foydalidir.