Oy birinchi marta xavf ostidagi madaniy meros obyektlari ro‘yxatiga kiritildi. Bu haqda Butunjahon yodgorliklar jamg‘armasi (WMF) veb-saytidagi matbuot bayonotida ma’lum qilindi.
“Oy ilk bor zaif madaniy obyektlar ro‘yxatiga kiritildi. Bu insoniyatning Yerdan tashqaridagi dastlabki qadamlarini aks ettiruvchi noyob ashyolarni tan olish va saqlash zarurligini ko‘rsatadi”, dedi WMF bosh direktori Benedikt de Montlo.
Ro‘yxatga Yerning yo‘ldoshidan tashqari, iqlim o‘zgarishi, sayyohlik, nizolar va tabiiy ofatlar ta’sir ko‘rsatayotgan 29 ta mamlakatdagi 24 ta obyekt ham kiritilgan. Ushbu ro‘yxatdan G‘azo shahrining tarixiy tuzilmasi, Ukrainadagi Kiyev O‘qituvchilar uyi, Afrikadagi Suahili sohillari, Turkiyadagi Antakya qadimiy shahri va Fransiyaning Sorbonna ibodatxonasi hamda boshqa obyektlar joy olgan.
De Montlo Oyning ro‘yxatga kiritilishi insoniyatning Yer sayyorasidan tashqaridagi dastlabki qadamlarini xotirada saqlash uchun zarurligini ta’kidladi. Uning fikricha, sun’iy yo‘ldoshga qo‘nishni tasvirga olgan videokamera, shuningdek, astronavt Bazz Oldrin tomonidan dunyo davlatlari rahbarlarining xabarlari bitilgan kremniy disk alohida qimmatga ega.
Bundan tashqari, zaif obyektlar ro‘yxatiga Turkiyaning Antakya shahri, Yaqin Sharqdagi mojarolar tufayli vayron bo‘lgan G‘azo shahridagi tarixiy binolar va And tog‘laridagi tog‘ yo‘llari tizimi kiritilgan.
2024-yil 22-dekabrda xabar berilganidek, Yaponiyaning Kioto universiteti va Kajima korporatsiyasi 2030-yillarga kelib Neo Lunar Glass stansiyasining yer ustidagi prototipini qurishni rejalashtirmoqda. Ushbu stansiya Yernikiga o‘xshash tortishish kuchini yarata oladi va insonlarga Oyda yashash imkonini beradi. Tadqiqotchilar guruhi Neo Lunar Glass inshootining diametri taxminan 200 metr va balandligi 400 metr bo‘lishini taxmin qilmoqda. Bu o‘lchamlar 10 ming nafargacha odamni sig‘dira olishga imkon yaratadi.
Izoh (0)