Hindiston Kosmik tadqiqotlar tashkiloti (ISPRO) hozirda Pragyan Oy roveri bilan bog‘lana olmayotganini ma’lum qildi, deb yozmoqda BBC.
Avgust oyida Oyga qo‘ngan Pragyan roveri ikki hafta davomida ma’lumotlar va tasvirlarni yig‘di. Qariyb 15 Yer kuni davom etadigan Oy kechasi boshlanishi bilan Pragyan “uyqu rejimiga” o‘tkazildi.
22-sentabr kuni quyosh chiqib, lunoxod akkumulyatorlari qayta zaryadlanganidan so‘ng modullar faol rejimga qaytishi kutilgan edi.
Ammo Oy kechasidagi qattiq sovuq batareyalarga zarar yetkazgan bo‘lishi ehtimoli bor. Shu sababli Pragyan bilan aloqa uzilib qolgan.
ISPRO aloqani tiklash bo‘yicha sa’y-harakatlarni davom ettirishni rejalashtirmoqda.
Eslatib o‘tamiz, 23-avgust kuni Hindistonning “Vikram” apparati “Pragyan” lunoxodi bilan Oy yuzasiga muvaffaqiyatli qo‘ngandi. Lunoxod Oy yuzasining elementar tarkibi haqida ilg‘or bilimlarni taqdim etishi kutilmoqda.
Hindiston missiyasi tarixda birinchi marta Yer sun’iy yo‘ldoshining kam o‘rganilgan janubiy qutbi yaqiniga qo‘nishga muvaffaq bo‘ldi. Olimlarning fikricha, bu hududda muz holatidagi suv va qimmatli elementlarning katta zaxiralari bo‘lishi mumkin.
Rossiyaning “Luna-25” stansiyasi avgust oyi oxirida Oyga qo‘nmoqchi bo‘lgan vaqtda halokatga uchradi.
Izoh (0)