Tarixda birinchi marta videokuzatuv kamerasi meteoritning qulashi paytidagi tovushni yozib oldi. Kosmik jism qulashi Kanadada qayd etilgan.
CBC News xabariga ko‘ra, Prins Eduard orolida yashovchi Jo Velaidum o‘z uyi oldida kosmik jism parchasini topgan. U toshni olimlarga topshirgan va ular bu meteoritga “Sharlottaun” deb nom bergan. Tosh yerga tushishdan oldin taxminan soatiga 200 kilometr tezlikka erishgan.
Veladium meteorit tushgan joyda hodisa yuz berishidan bir necha daqiqa oldin turgan. Alberta universiteti xodimi Kris Xerdning aytishicha, meteoritning ovoz chiqarib tushishi ilk bor fan tarixida videoga olindi.
O‘lchami 30 metrgacha bo‘lgan kosmik jism meteorit hisoblanadi. Undan kattaroq jismlar esa asteroidlar sanaladi. Meteorit Yer atmosferasiga sekundiga 11,2 kilometrdan 72 kilometrgacha tezlikda kiradi. Ba’zida u dinozavrlarni qirib tashlagan mashhur Chiksulub meteoritidek ulkan bo‘ladi. Ba’zan esa juda kichkina bo‘ladi — bunday meteoritlar yerga juda ko‘p miqdorda, kuniga ikki tonnagacha tushadi.
Yirik meteoritning tushgan joyida krater hosil bo‘lishi mumkin. Oy yoki Marsda Yerdagiga nisbatan ko‘proq meteorit kraterlari mavjud. Buning sababi Yerda havo borligi, atmosferaning ancha zichligi. Meteoritlar undan o‘tayotganda qizib ketadi va ko‘pincha yerga yetib kelmasdan yonib ketadi.
Izoh (0)