G‘azoda HAMAS yetakchisi Yahyo Sinvar o‘ldirilganidan so‘ng uning ukasi Muhammad Sinvar uning o‘rniga rahbar bo‘ldi, deb xabar bermoqda The Wall Street Journal.
Nashrga ko‘ra, u hozirda guruhni qayta tiklash ustida ish olib bormoqda.
Aniqlanishicha, 2024-yil oktyabrida Yahyo Sinvar o‘ldirilgach, Qatarda joylashgan HAMAS rahbarlari jamoaviy boshqaruv kengashini tuzishga qaror qilishgan. Biroq gazetaning arab manbalariga ko‘ra, G‘azo sektoridagi guruh jangchilari bu taklifni qabul qilmagan va endi Muhammad Sinvar rahbarligida mustaqil harakat qilmoqda.
WSJ’ning arab amaldorlari bilan suhbatlashgan muxbirlarning qayd etishicha, Isroil harbiy kuchlari tomonidan sezilarli darajada zaiflashtirilgan HAMAS yangi jangchilarni yollashni davom ettirmoqda. Bunda u jangchilarning oilalariga oziq-ovqat va tibbiy yordam va’da qilmoqda. Yollangan jangchilar bir necha kishidan iborat kichik guruhlarda hujum qilib, maxsus harbiy tayyorgarlikni talab qilmaydigan o‘qotar va tankka qarshi qurollardan foydalanmoqda.
Isroil harbiylariga ko‘ra, so‘nggi bir necha oy ichida HAMAS asosan G‘azo sektorining shimoliy qismida yuzlab odamlarni o‘z safiga jalb qilgan.
Muhammad Sinvar taxminan 50 yoshda ekanligi aytilmoqda. U ham akasi singari yoshligidan guruhga qo‘shilgan, ammo Yahyo Sinvardan farqli o‘laroq, Isroil qamoqxonasida bo‘lmagan va “Isroil xavfsizlik xizmatlari uchun kamroq tanish shaxs” hisoblanadi. Arab amaldorlarining so‘zlariga ko‘ra, Muhammad Sinvar asosan parda ortida faoliyat yuritgan va shu bois “soya” laqabini olgan.
G‘azo sektoridagi jangarilarni Muhammad Sinvar boshqarayotgani haqida WSJ nashrida Isroilning iste’fodagi brigada generali Amir Avivi ham ma’lumot berdi. Uning aytishicha, harbiylar HAMASning yangi rahbarini topish uchun “barcha kuch-g‘ayratlarini” sarflamoqda.
Yahyo Sinvar Isroil qamoqxonalarida 20 yildan ortiq vaqt o‘tkazgan. U 1988-yilda qamoqqa olinib, 12 ta qotillik uchun to‘rt marta umrbod qamoq jazosiga hukm qilingan, biroq 2011-yil oktyabrida besh yil oldin o‘g‘irlab ketilgan Isroil askari Gilad Shalitni ozod qilish bo‘yicha kelishuv doirasida ozod etilgan. Isroil Muhammad Sinvarni Shalitni o‘g‘irlashda aybdorlardan biri deb hisoblaydi.
2024-yil avgustda Yahyo Sinvar Tehronda avvalgi rahbar Ismoil Haniyaning o‘ldirilishidan so‘ng HAMAS siyosiy byurosi rahbari bo‘lgan edi. Bunga qadar Sinvar, Haniya singari, uzoq vaqt davomida Isroil harbiylarining asosiy nishonlaridan biri bo‘lgan - Isroilda uni HAMASning 2023-yil 7-oktyabrdagi hujumining bosh tashkilotchisi deb atashgan. 2024-yil 16-oktyabrda Isroilning G‘azo janubidagi Rafah shahriga hujumi chog‘ida Sinvarni bombardimonda vayron bo‘lgan binolardan birida topishdi va u shu yerda halok bo‘ldi.
Yahyo Sinvar o‘ldirilganidan so‘ng, Al-Jazeera telekanali uning ukasi Muhammadni uning o‘rniga bo‘lishi mumkin bo‘lgan nomzodlardan biri sifatida tilga oldi. Boshqa nomzodlar qatorida 1996-yildan 2007-yilgacha guruhning siyosiy qanotiga rahbarlik qilgan Xolid Mashal va HAMAS asoschilari orasida bo‘lgan Muso Abu Marzuk ham bo‘lgan.
Izoh (0)