“Surxondaryo viloyatining tog‘li-rekreatsion hududlarida turizm infratuzilmasini yaxshilash hamda zamonaviy xizmat ko‘rsatish va turizm obyektlarini barpo etish chora-tadbirlari to‘g‘risida”gi prezident qarori qabul qilindi.
Hujjatda qayd etilishicha, Surxondaryo viloyatining tog‘li va tog‘oldi hududlarining mavjud turistik salohiyatidan samarali foydalanish, master reja asosida xizmat ko‘rsatish majmualari va turizm infratuzilmasi obyektlarini, jumladan, mehmonxonalar, oilaviy mehmon uylari, sog‘lomlashtirish, umumiy ovqatlanish, savdo va xizmat ko‘rsatish obyektlari, sanatoriy va xalqaro umummavsumiy kurort zonalarini rivojlantirish hamda yangi ish o‘rinlarini yaratish maqsad qilingan.
Qarorga ko‘ra, quyidagilar tashkil etiladi:
- Boysun tumani hududidagi umumiy maydoni 220,5 gektar bo‘lgan yer uchastkasida “Omonxona” turistik markazi;
- Sariosiyo tumani hududidagi umumiy maydoni 615 gektar bo‘lgan yer uchastkasida “Sangardak” turistik markazi;
- Jarqo‘rg‘on tumani Obihayot mahallasidagi “Oqtepa” suv omborining qirg‘oq bo‘yi hududidagi 110 gektar yer uchastkasida “Obihayot” turistik markazi;
- “Omonxona”, “Sangardak” va “Obihayot” turistik markazlarini rivojlantirish va boshqarish uchun davlat muassasasi shaklida Surxondaryo viloyatida turizm infratuzilmasini rivojlantirish va boshqarish direksiyasi.
Turistik markazlar hududlarida tadbirkorlik va shaharsozlik faoliyatini amalga oshirish uchun mo‘ljallangan bo‘sh yer uchastkalari mulk huquqi yoki ijara huquqi asosida elektron onlayn auksion orqali realizatsiya qilinadi.
Xususiy investitsiyalarni jalb qilgan holda 2025—2027-yillarda mehmonxonalar, oilaviy mehmon uylari, xizmat ko‘rsatish majmualari va dam olish maskanlarini qurish maqsadida bo‘sh yer uchastkalari 10 yil muddatda teng ulushlarda bo‘lib-bo‘lib to‘lash sharti bilan elektron onlayn auksion savdolariga chiqariladi.
Surxondaryo viloyati hokimligi, Kadastr agentligi, Bosh prokuratura, “O‘zbekkosmos” agentligi direksiya bilan birgalikda bir oy muddatda turistik markazlar hududlaridagi yer uchastkalarini to‘liq xatlovdan o‘tkazib, aniqlangan o‘zboshimchalik bilan egallab olish va noqonuniy qurilish holatlarini qonunchilikda belgilangan tartibda bartaraf etish bo‘yicha tegishli choralarni ko‘radi.
Bundan avval Chorvoq suv ombori bo‘yida xalqaro turizm markazi barpo etilishi rejalashtirilayotgani haqida xabar berilgan edi.
Izoh (0)