Hindiston hukumati Rossiyadan Ukrainaga qarshi urishayotgan fuqarolarini muddatidan oldin ozod etishni talab qildi. Bu haqda Deccanherald xabar berdi.
Tegishli talab Hindiston fuqarosining jang maydonida halok bo‘lgani fonida e’lon qilindi. Gap Kerala shtatining Trissur shahrida tug‘ilgan Binil Babu haqida bormoqda. Uning qachon va qayerda halok bo‘lgani aniq emas. Biroq uning o‘limi haqidagi xabardan so‘ng Nyu Deli Rossiya hukumatidan barcha hindlarni tezroq vataniga qaytarishni talab qilgan.
Hozirda Hindistonning Moskvadagi elchixonasi Babuning jasadini uning ona shahriga yetkazib berish masalasini hal qilmoqda.
“Biz marhumning oilasiga chuqur ta’ziyamizni bildiramiz. Moskvadagi elchixonamiz jabrlanganlarning oilalari bilan aloqada bo‘lib, mumkin bo‘lgan barcha yordamni ko‘rsatmoqda. Marhumning jasadini Hindistonga tezroq yetkazib berish uchun Rossiya hukumati bilan hamkorlik qilmoqdamiz. Qolgan hind fuqarolarini tezroq ozod qilish haqidagi talabimizni ham takrorladik”, dedi Hindiston Tashqi ishlar vazirligi vakili Randhir Jaysval.
Hindiston hukumati, shuningdek, Moskvadan Ukrainadagi janglarda yaralangan, Rossiya armiyasi bilan shartnoma tuzgan Jayn Kurienni iloji boricha tezroq vataniga qaytarishni talab qilmoqda.
Hindiston fuqarolari Rossiya armiyasi safida
2024-yil 13-dekabrda Rossiya qo‘shinlarida Hindistonning 19 nafar fuqarosi qolgani ma’lum bo‘lgandi. Hindiston hukumati Rossiyadan armiyadagi hindistonliklar joylashuvi haqida yangilangan ma’lumot berishni, shuningdek, ularning xavfsizligini ta’minlash va tezroq harbiy xizmatdan bo‘shatishni so‘rab murojaat qilgan.
Avgust oyida tashqi ishlar vaziri Subramanyam Jayshankar 91 nafar hindistonlik Rossiya armiyasiga chaqirilgani va ulardan sakkiz nafari halok bo‘lganini aytgan.
Sentyabr oyida 45 nafar hindistonlik Rossiya armiyasidan bo‘shatilgach, 50 nafari Ukrainaga qarshi jang qilishni davom ettirgan. Ular noqonuniy ravishda Rossiya armiyasiga qo‘shilishga majburlangani va frontga jo‘natilgani aytmoqda.
Iyul oyida Hindiston bosh vaziri Narendra Modi Moskvaga tashrifi va Rossiya prezidenti Vladimir Putin bilan uchrashuvi chog‘ida hindlarni harbiy xizmatdan bo‘shatish va yangi yollashlarga yo‘l qo‘ymaslik masalalarini ko‘targandi.
Putin har ikki masalani hal qilishga ko‘maklashishini aytgan. Ko‘p o‘tmay, bir nechta hind oilalari Ukrainadagi urushda halok bo‘lgan qarindoshlari uchun “Rossiyadan tovon puli” ola boshlaganini bildirgan. Gap o‘n minglab dollar miqdoridagi mablag‘ haqida ketmoqda.
Mart oyi boshida Hindiston Markaziy tergov byurosi (CBI) bir oy ichida 35 ga yaqin hind fuqarosi aldov yo‘li bilan Rossiya armiyasiga yollanganini xabar qildi. Jami ularning soni yuzdan ortiq bo‘lishi mumkin. Ikki kishi halok bo‘lgan, yana bir nechasi og‘ir yaralangan.
May oyida Hindistonda mahalliy aholini Ukrainadagi urushga yuborish uchun yollash bilan shug‘ullangan olti kishidan iborat tarmoq fosh etildi. Ular ijtimoiy tarmoqlar va bir nechta shtatlardagi mahalliy yollovchilar orqali ish olib borgan. Jinoyatchilar hindlarga Rossiyada qo‘riqchi bo‘lib ishlashni va’da qilgan. Ko‘pincha shartnomaga qishloq joylaridan kelib chiqqan, ma’lumoti past va hujjatlarni imzolashda aldangan yoshlar jalb qilingan.
Izoh (0)