Ukrainadagi harbiy harakatlar bu yil yakunlanishi mumkin, chunki AQSHning saylangan prezidenti Donald Tramp mojaroni hal etish uchun katta kuch sarflamoqda, deb ta’kidladi Vladimir Zelenskiy.

Biroq, uning so‘zlariga ko‘ra, bu Yevropa xotirjam bo‘lishi kerak degani emas: aksincha, Ukrainaga ko‘rsatilayotgan yordamni kuchaytirish lozim, chunki uning armiyasisiz Yevropa Rossiyaga qarshi kurashda g‘olib chiqolmaydi.

Varshavaga tashrifi davomida Polsha ommaviy axborot vositalari bilan suhbatlashgan Zelenskiy, joriy yilda jang harakatlarini to‘xtatish imkoniyati oshganmi, degan savolga ijobiy javob berdi.

“Tramp urushni jiddiy ravishda to‘xtatmoqchi — bu uning so‘zlari. U Rossiyaga bosim o‘tkazishga, ta’sir ko‘rsatishga qodir. Ishonchim komilki, Rossiya AQSH, Xitoy va birlashgan Yevropadan cho‘chiydi”, dedi Ukraina yetakchisi.

Zelenskiyning ta’kidlashicha, Ukrainaning Rossiyaga qarshi kurashda g‘alaba qozonishi Yevropa uchun hal qiluvchi ahamiyatga ega, jumladan Kreml boshqa mamlakatlarga bostirib kirishining oldini olish uchun ham muhim.

“Ukraina armiyasisiz Yevropa Rossiyaga bas kelolmaydi, chunki Rossiya armiyasi kattaroq: ruslarning qurol-yarog‘i, askarlari ko‘proq va u yevropaliklardan ko‘ra shafqatsizroq”, deydi u.

Zelenskiyning fikricha, G‘arbda (Skandinaviya va Boltiqbo‘yi mamlakatlari, Polsha va Ruminiyadan tashqari) Putinning kengayish niyatlarini hali to‘liq anglab yetishmagan. Agar Ukraina o‘zini himoya qilmasa, “u tez orada olg‘a siljiydi”,

“Ukraina armiyasisiz esa afsuski, bugun Yevropaning Rossiyaga qarshi kurashish imkoniyati yo‘q. Putin buni biladi va o‘z doirasida bu haqda gapiradi”, deya qo‘shimcha qildi Zelenskiy.

Yevropada Tramp Kiyevni Rossiya bilan muddatidan oldin muzokaralarga va sezilarli yon berishlarga majbur qilmasligiga umid qilib, Ukrainadagi vaziyatni hal etish imkoniyatiga nisbatan optimistik kayfiyat paydo bo‘ldi. Shu bilan birga, Trampning jamoasida mojaroni tez orada hal qilib bo‘lmasligini tushunish shakllandi. Saylangan prezidentning nutqi o‘zgardi: endi u urushni 24 soatda tugatish haqida emas, balki olti oy ichida yakunlashga intilishi haqida gapirmoqda.

“Kelishuvlarga erishish uchun bir necha oy kerak bo‘ladi, ehtimol, bundan ham ko‘proq vaqt talab etilishi mumkin”, deya ta’kidlamoqda Tramp maslahatchilari.

Avvalroq Bloomberg nashri  Putin Tramp bilan Ukraina bo‘yicha bo‘lajak muzokaralarda Kiyevdan NATO bilan harbiy hamkorlikni keskin qisqartirishni, shuningdek, blokka a’zo bo‘lish rejalaridan butunlay voz kechishni talab qilmoqchi ekani haqida yozgandi. 

Bloomberg suhbatdoshlarining aytishicha, Putin jang maydonida ustunlikka ega ekaniga ishonadi va shu sababli Ukrainani cheklangan qurolli kuchga ega neytral davlatga aylantirishga intilmoqda.

Shuningdek, Kremlning pozitsiyasi shundan iboratki, NATO a’zo davlatlari Ukrainaga yakka tartibda qurol yetkazib berishni davom ettirishi mumkin, biroq ularning qurollari Rossiyaga qarshi yoki boy berilgan hududlarni qaytarib olishga urinish uchun ishlatilmasligi kerak.

Manbalarga ko‘ra, Putin uch yillik urush davomida Rossiya armiyasi egallab olgan Ukraina hududining kamida 20 foizi ustidan Rossiya nazoratni saqlab qolishini talab qilmoqda. Shu bilan birga, agentlik manbalari Moskva “ba’zi hududlarni almashtirishga” tayyorligini qayd etgan.