Hindiston Quyoshni tadqiq qilishga mo‘ljallangan Aditya-L1 avtomatik stansiyasini muvaffaqiyatli uchirdi, deb xabar bermoqda Hindiston kosmik tadqiqotlar tashkiloti (ISRO).
Bortida Aditya-L1 stansiyasi bo‘lgan PSLV C57 (Polar Satellite Launch Vehicle) raketa-tashuvchisi Bengal ko‘rfazidagi Shrixarikota orolida milliy kosmodromdan uchirilgan.
“Qurilma sun’iy yo‘ldoshni mo‘ljallangan orbitaga aniq olib chiqdi. Hindistonning birinchi Quyosh observatoryasi Quyosh-Yer tizimining L1 nuqtasiga safarini boshladi”, — deyiladi tashkilot xabarida.
L1 nuqtasi Yerdan taxminan 1,5 million kilometr uzoqlikda joylashgan. Hindiston stansiya Yer orbitasida 16 kun turishi, so‘ng yana 110 kun L1 ga tomon yurishi kerak.
Aditya-L1 — Quyoshni o‘rganish bo‘yicha birinchi hind missiyasi. Uning asosiy maqsadlari — Quyosh xromosferasi va tojini o‘rganish, magnit maydon va zarralar oqimini o‘lchash. Bortda yettita asbob bor: to‘rttasi masofadan zondlash, uchtasi joyida kuzatishga mo‘ljallangan.
Eslatib o‘tamiz, 23-avgust kuni Hindistonning “Vikram” apparati “Pragyan” lunoxodi bilan Oy yuzasiga muvaffaqiyatli qo‘ngandi. Lunoxod Oy yuzasining elementar tarkibi haqida ilg‘or bilimlarni taqdim etishi kutilmoqda.
Hindiston missiyasi tarixda birinchi marta Yer sun’iy yo‘ldoshining kam o‘rganilgan janubiy qutbi yaqiniga qo‘nishga muvaffaq bo‘ldi. Olimlarning fikricha, bu hududda muz holatidagi suv va qimmatli elementlarning katta zaxiralari bo‘lishi mumkin.
Izoh (0)