NATO bosh kotibi Mark Ryutte Yevropa ittifoqi mamlakatlari mudofaaga ko‘proq pul sarflash uchun ba’zi xarajatlarini qayta ko‘rib chiqishi kerakligini aytdi. Bu haqda u Yevroparlamentda so‘zlagan nutqida ma’lum qildi.
Ryuttening fikricha, mudofaa xarajatlari ko‘rsatkichini yalpi ichki mahsulotning 2 foizida oshirish zarur. U o‘z maqsadlaridan biri sifatida NATO va Yevropa ittifoqini yaqinlashtirish ekanini ta’kidladi. Bu orqali Kreml olib borayotgan “beqarorlashtirish kampaniyalari”ga hamda Xitoy va Erondan kelayotgan tahdidlarga qarshi turishni nazarda tutdi.
“Hozir biz xavfsizmiz, ammo to‘rt-besh yildan so‘ng ahvol qanday bo‘ladi...”, dedi NATO bosh kotibi. U agar mudofaa xarajatlari oshirilmasa, yevropaliklar “rus tili kurslariga borishga yoki Yangi Zelandiyaga ko‘chib ketishga” majbur bo‘lishini ta’kidladi.
“Men Yevropadagi xavfsizlik vaziyatidan chuqur tashvishdaman. Biz na urush, na tinchlik holatidamiz. Bu shuni anglatadiki, mudofaaga ko‘proq mablag‘ sarflashimiz va salohiyatimizni oshirishimiz zarur. Buni kechiktirib bo‘lmaydi. Jamiyatlarimiz va muhim infratuzilmamiz barqarorligini kuchaytirish lozim”, dedi Ryutte.
Financial Times xabar berishicha, AQSHning saylangan prezidenti Donald Tramp NATO mamlakatlari har yili YIMning kamida 5 foizini mudofaaga sarflashini xohlaydi. Hozirgi NATO ichidagi kelishuvlarga ko‘ra, a’zo davlatlar mudofaaga YIMning kamida 2 foizini sarflashi shart (2024-yilda blokning 32 a’zosidan atigi 23 tasi bu talabni bajardi).
NATO mamlakatlari rasmiy vakillari Tramp talab qilayotgan mudofaa xarajatlarini oshirish zarurligiga rozi bo‘lgan. Biroq u taklif etgan 5 foizlik ko‘rsatkichni ma’qullashmagan. FT manbalaridan birining fikricha, oxir-oqibat Tramp 3,5 foizlik darajaga rozi bo‘lishi mumkin, ammo buning evaziga u yevropalik ittifoqchilardan AQSH bilan yanada foydali savdo shartlarini talab qiladi.
Izoh (0)