Vladimir Zelenskiy AQSHning saylangan prezidenti Donald Tramp ma’muriyati Ukrainadagi mojaroga barham berishni tezlashtirishi mumkinligini aytdi.
“Urush tugaydi, ammo sanasi hozircha noma’lum. Endilikda Oq uyni boshqaradigan yangi jamoaning siyosati bilan urush tezroq tugaydi, bu ularning Amerika jamiyatiga bergan va’dasi. Ular uchun va’dani bajarish juda muhim”, dedi Zelenskiy Public nashriga bergan intervyusida.
Avvalroq The New York Times jurnalisti ko‘plab ukrainaliklar Trampning AQSH prezidentlik saylovlarida g‘alaba qozonishi bilan Ukraina uchun urush mohiyatan tugadi, deb hisoblashini yozgandi. Shu bilan birga, ukrainaliklarning fikricha, ular hududlarning ma’lum qismidan voz kechishga majbur bo‘ladi.
Tramp Ukrainadagi mojaroni imkon qadar tezroq to‘xtatish niyatida ekanini bir necha bor ta’kidlagan. Oq uyning bo‘lajak rahbari o‘zining rejasi tafsilotlarini oshkor qilmadi, ammo G‘arb ommaviy axborot vositalarida u Kiyevni hududlarni yo‘qotganini tan olishga majburlashi haqida taxminlar paydo bo‘ldi.
NATO bosh kotibining chaqirig‘i
Urushni tugatish bo‘yicha Rossiya bilan muzokaralarni qachon boshlashni faqat Ukraina hal qilishi mumkin. Bu haqda NATO bosh kotibi Mark Ryutte Latviya prezidenti Edgars Rinkevich bilan qo‘shma matbuot anjumanida ma’lum qildi.
Shu bilan birga, Ukraina kuch pozitsiyasidan muzokaralar olib borish imkoniga ega bo‘lishi uchun Ryutte NATO ittifoqchilarini harbiy yordam berishda davom etishga chaqirdi.
“Faqat Ukraina hukumati Rossiya bilan muzokaralarni boshlash yoki boshlamaslik va bu urushni qanday tugatish haqida qaror qabul qilishi mumkin. Lekin ukrainaliklar buni kuchli pozitsiyadan turib amalga oshirishi kerak. Shuning uchun mudofaa yordamini yetkazishda davom etishimiz lozim”, deya ta’kidlagan Ryutte.
Ukrainaning frontdagi ahvoli yomon
Ukraina frontda Rossiyaga yutqazmoqda. Bu haqda NATO bosh kotibi Mark Ryutte Varshavadagi matbuot anjumanida ma’lum qilgan.
“Endilikda qish davomida, kerak bo‘lsa undan ham uzoqroq muddat Ukrainaga harbiy yordam kelishda davom etishini ta’minlashimiz kerak. Ukraina o‘z hududlarini yo‘qotmoqda. Biz Ukrainaning frontdagi ahvolini barqarorlashtirishga, keyin esa o‘z hududlarini qaytarishga yordam berishimiz zarur”, dedi Ryutte.
Izoh (0)