Yevropa Ittifoqining ichki bozor va xizmatlar bo‘yicha komissari Terri Bretonning so‘zlariga ko‘ra, AQSH prezidentligiga Respublikachilar partiyasidan nomzod Donald Tramp milliarder Ilon Mask bilan suhbat chog‘ida bemalol “yolg‘on bayonotlar” tarqatishi mumkin. Breton bu haqda X ijtimoiy tarmog‘ida ma’lum qildi.
Suhbat e’lon qilinganidan ko‘p o‘tmay, Yevropa komissari Ilon Maskka yo‘llagan maktubida uning idorasi suhbat davomida “zo‘ravonlik, nafrat va irqchilikni qo‘zg‘atishi mumkin bo‘lgan kontentning tarqalishini” diqqat bilan kuzatib borishi haqida ogohlantirgan.
Mask Yevropa Ittifoqi qonunlariga rioya qilishga majbur, deya ta’kidlagan Breton.
Uning so‘zlariga ko‘ra, Yevropa Ittifoqining Raqamli xizmatlar to‘g‘risidagi qonuni (DSA) platformadan AQSH saylovlari kabi “tegishli voqealar bilan bog‘liq zararli kontentning tarqalishini samarali ravishda bostirishni” talab qiladi.
Mening idoram va men juda hushyor bo‘lamiz. Agar qonunbuzarlik belgilari bo‘lsa, Bryussel jarimalar kabi vaqtinchalik choralar qo‘llash huquqini o‘zida saqlab qoladi, deya qo‘shimcha qilgan Yevropa Ittifoqining raqamli texnologiyalar bo‘yicha komissar.
Mask Bretonning maktubiga mem bilan javob bergan va kinoya bilan u hech qachon bunday qo‘pol hamda mas’uliyatsiz harakatga qaror qilmaganini aytgan. Tramp saylovoldi kampaniyasi, o‘z navbatida, Yevropa Ittifoqi o‘z biznesi bilan shug‘ullanishi va AQSH prezidentlik kampaniyasiga aralashishga urinmasligini so‘ragan.
Milliarder Tramp bilan suhbat boshlanishi e’lon qilingan vaqtda X’ga katta DDOS hujumi bo‘lganini aytgan. Natijada suhbat belgilanganidan taxminan 45 daqiqa kechroq boshlangan.
Mask va Tramp o‘rtasidagi audiomuloqotda ko‘tarilgan mavzular AQSHda bo‘lajak saylovlar, Rossiya bilan munosabatlar, Ukrainadagi urush, NATO muammolari, global isishning mavjudligi, elektromobil bozorining rivojlanishi va boshqa masalalar bo‘lgan.
Izoh (0)