Eron prezidenti Rossiyaga qurollar yetkazib berilganini rad etdi

Eron prezidenti Mas’ud Pezeshkiyon Rossiyaga hech qanday qurol-yarog‘ yetkazib berilmaganini ma’lum qildi. Bu haqda Reuters xabar berdi.

Biz Rossiyaga qurol yetkazib bermadik, dedi Pezeshkiyon matbuot anjumanida.

U Rossiyaning Ukrainaga qarshi urushiga izoh berar ekan, bu “inqiroz”ning paydo bo‘lishiga NATO mamlakatlari sharqqa kengaymaslik haqidagi va’dasini buzgani sabab bo‘lganini aytdi. Yevropa rasmiylari esa Eronni Rossiyaga ballistik raketalar yetkazib berishda ayblamoqda.

Avvalroq ommaviy axborot vositalari Eron Rossiyaga qisqa masofali ballistik raketalarni yuborgani haqida xabar bergandi. Tehron rasman raketa yetkazib berilganini rad etadi.

Biroq Eron deputati Ahmad Baxshayesh Ardestoniy mamlakati haqiqatan ham Moskvaga ballistik raketalar yetkazib berganini aytgan.

Shundan so‘ng Eronning Ukrainadagi muvaqqat ishlar vakili Shahriyor Amuzegar Tashqi ishlar vazirligiga chaqirilgan. Eron mazkur hodisadan keyin Rossiyaga ballistik raketalar topshirilganini inkor etib, AQSH joriy etgan sanksiyalar go‘yoki muammoni hal qilmasligini, aksincha uni yanada og‘irlashtirayotganini aytdi.