Polsha mudofaa vaziri Vladislav Kosinyak-Kamish ehtimoliy o‘t ochishni to‘xtatishni mustahkamlash uchun Ukrainaga qo‘shinlar yuborishni rad etdi. Bu haqda Financial Times xabar berdi.
“Tinchlik rejasi (AQSHning saylangan prezidenti Donald Trampning tinchlik rejasi) paydo bo‘lganda, biz uni muhokama qilamiz. Biroq chegaradosh davlatlar Ukrainaga o‘z qo‘shinlari bilan kirishi kerak bo‘lgan mamlakatlar emas. Chunki men NATO doirasida mas’uliyatni keng taqsimlash va diversifikatsiya qilish lozim deb hisoblayman”, dedi vazir.
Nashrning eslatishicha, Polsha Ukrainani Rossiyadan himoya qilishda uning sodiq ittifoqchisi. Biroq mamlakatlar o‘rtasidagi munosabatlar tarixiy kelishmovchiliklar, Ukrainaning arzon qishloq xo‘jaligi mahsulotlari eksporti va o‘z vatanini tark etgan Ukraina fuqarolarining ko‘payib borayotgan noroziligi tufayli keskinlashgan.
“Albatta, Polsha jamiyatida charchoq bor, va bu tushunarli, ayniqsa bu yerda odamlar yosh ukrainalik erkaklarning eng so‘nggi mashinalarda yurishlari yoki besh yulduzli mehmonxonalarda to‘xtab qolishlarini ko‘rishganda”, dedi Kosinyak-Kamish.
Ukraina va Polsha o‘rtasidagi yana bir keskinlik Polshaning MiG-29 samolyotlari zaxirasini Ukrainaga yetkazib berishdan bosh tortishi bo‘ldi. Varshavaning so‘zlariga ko‘ra, ular hali ham o‘z xavfsizligi uchun kerak.
“Bir tomondan, prezident Zelenskiyni tushunaman, chunki uning vazifasi doimo ko‘proq yordam so‘rashdan iborat. Biroq menimcha, u va Ukraina shuni ham esda tutishlari kerakki, boshqalar faqat kaskalar jo‘natayotgan paytda, biz tanklar yuborgandik”, deya ta’kidladi Polsha mudofaa vaziri.
Yevropa ittifoqi Ukrainaga 100 minggacha harbiy yubormoqchi
Yevropa davlatlari o‘t ochish to‘xtatilganidan keyin Ukrainaga 100 minggacha qo‘shin yuborishni muhokama qilmoqda. Bunda asosiy kuchlarni Fransiya, Germaniya, Italiya, Polsha va Buyuk Britaniya harbiylari tashkil etishi ehtimoli yuqori. Yevropa kontingentini Ukrainaga yuborish bo‘yicha muzokaralar dastlabki bosqichda. Ammo mamlakatlar o‘rtasida allaqachon kelishmovchiliklar mavjud.
Ayrim Yevropa rahbarlari bu Rossiya prezidenti Vladimir Putinda muzokaralar vaqti kelgani va u jang maydonidagi pozitsiyasini saqlab qolishi mumkinligi haqida taassurot uyg‘otishni xohlamaydi. Parda ortida ba’zi amaldorlar Yevropa ittifoqi Ukrainaga bera oladigan ehtimoliy kafolatlarni ham ko‘rib chiqmoqda.
Izoh (0)