Indoneziya BRIKSga to‘laqonli a’zo sifatida qo‘shildi. Bu haqda 1-yanvar kuni assotsiatsiyaga raislikni o‘z zimmasiga olgan Braziliya hukumati xabar berdi.
A’zo davlatlar 2023-yilda Yoxannesburgda bo‘lib o‘tgan sammitda Indoneziyaning a’zolikka qabul qilinishini ma’qullagandi. Indoneziyaning arizasi 2023-yilda tasdiqlangan, ammo mamlakat prezidentlik saylovlaridan keyin qo‘shilish jarayonini yakunlashini bildirgan. Prabovo Subyanto 2024-yil oktyabr oyida davlat rahbari lavozimini egalladi, deya eslatdi Reuters.
Indoneziya guruhning boshqa a’zolari bilan birgalikda global boshqaruv institutlari islohotlarini qo‘llab-quvvatlamoqda va global janub hamkorligini chuqurlashtirishga ijobiy hissa qo‘shmoqda, deyiladi Braziliya hukumati bayonotida.
Braziliyaning BRIKSdagi raisligi
Braziliya o‘z raisligi doirasida “yanada inklyuziv va barqaror boshqaruv”ni yo‘lga qo‘yish ustida ishlamoqda. U beshta asosiy ustuvor yo‘nalishga e’tibor qaratgan: samarali to‘lov tizimlarini rivojlantirish orqali savdo va investitsiyalarni rag‘batlantirish; sun’iy intellektni tartibga solish; iqlim o‘zgarishiga qarshi kurashish va BMTning iqlim o‘zgarishi bo‘yicha 30-konferensiyasiga tayyorgarlik ko‘rish; jamoat salomatligi sohasidagi hamkorlik hamda BRIKSning ichki tuzilmalarini mustahkamlashni o‘z ichiga olgan institutsional rivojlanish.
Turkiya BRIKSga a’zo bo‘lish uchun ariza topshirdi
BRIKS — norasmiy davlatlar guruhi bo‘lib, dastlab unga Rossiya, Braziliya, Hindiston va Xitoy kirgan. 2010-yilda Janubiy Afrika Respublikasi ham qo‘shilgan. 2024-yil sentyabr oyida NATO a’zosi bo‘lgan Turkiyaning BRIKSga a’zolik uchun ariza topshirgani ma’lum bo‘ldi. Vyetnam ham bu birlashmaga qo‘shilishi mumkinligi aytilmoqda.
BRIKS guruhi yaqinda o‘z tarkibini Misr, Birlashgan Arab Amirliklari, Efiopiya va Eronni qo‘shib kengaytirdi.
Izoh (0)