Ukraina armiyasi Germaniyaning RCH 155 o‘ziyurar gaubitsasini qabul qilish bilan Shveysariya, Buyuk Britaniya, Italiya, Niderlandiya, Ispaniya, Qo‘shma Shtatlar, hatto ishlab chiqaruvchi davlatni ortda qoldirib, birinchi operatorga aylandi.
Krauss-Maffei Wegmann (KMW) kompaniyasi tomonidan ishlab chiqarilgan o‘ziyurar artilleriya tizimi Kassel shahridagi zavodda tantanali tarzda topshirildi. Marosimda Germaniya mudofaa vaziri Boris Pistorius va Ukraina elchisi Oleksiy Makeyev ishtirok etdi.
Bu 2022-yili 54 ta texnika uchun imzolangan shartnoma doirasida birinchisidir.
Biroq RCH 155 artilleriya tizimlari jangga kirishi uchun biroz vaqt ketishi mumkin. Boisi ularni boshqaradigan ekipaj va texnik personalni tayyorlash zarur. Qolaversa, artilleriya batareyasini shakllantirish uchun yetarli miqdordagi birliklarni ishlab chiqarish ham taqazo qilinadi.
U nimasi bilan ajralib turadi?
RCH 155 o‘ziyurar gaubitsasi o‘zining mobilligi bilan mashhur. Boxer 8x8 g‘ildirakli platformasining yuqori harakatchanligi tufayli tizim jangovar pozitsiyasini tezda o‘zgartirishi va dushman javob zarbasidan qochishi mumkin.
Tizim butunlay avtomatlashtirilgan. Ikki kishilik ekipaj himoyalangan kapsulada o‘tiradi. Uni, shuningdek, masofadan boshqarish ham mumkin. Bu harbiy xizmatchilar xavfsizligini ta’minlaydi.
RCH 155 NATO standartidagi 155 mm kalibrli snaryadlardan foydalanadi. O‘t ochish masofasi an’anaviy o‘q-dorilar bilan 30 kilometr, reaktiv snaryadlar qo‘llanganda esa 40-54 kilometrgacha boradi. U bir daqiqada 8 marta o‘q uzishi mumkin.
Biroq tizimning eng katta ustunligi harakat vaqtida ham zarba bera olishi bilan bog‘liq. Ilg‘or texnologiyalar, xususan, nishonga olish, navigatsiya va stabilizatsiya tizimlari sharofati bilan buning imkoni bor.
Germaniyaning Ukrainaga harbiy yordami
Germaniya hukumati Ukrainaning Qo‘shma Shtatlardan so‘ng ikkinchi eng yirik donori hisoblanadi. Mamlakat 2022-yildan buyon 10 mingdan ortiq ukrainalik askarni harbiy tayyorgarlikdan o‘tkazdi.
Bundan tashqari, Berlin Kiyevni Patriot, IRIS-T havo mudofaa tizimlari, shuningdek Leopard 2 tanklari va Marder piyoda jangovar mashinalari bilan ta’minlab kelmoqda.
Izoh (0)