Ukraina prezidenti ofisi rahbari Andrey Yermak AQSHning saylangan prezidenti Donald Tramp jamoasi vakillari – milliy xavfsizlik bo‘yicha maslahatchi lavozimiga nomzod Mayk Vals hamda Rossiya va Ukraina bo‘yicha maxsus elchi lavozimiga da’vogar Keyt Kellog bilan uchrashdi. Bu haqda Reuters va The Wall Street Journal (WSJ) xabar berdi.
Reuters suhbatdoshlari Ukraina delegatsiyasi va Tramp jamoasi o‘rtasidagi uchrashuv tafsilotlarini keltirmagan. WSJ ma’lumotlariga ko‘ra, munozaralarga saylangan vitse-prezident J.D.Vens ham qo‘shilgan. Bundan oldin, nashr Yermak Floridada Tramp boshqaruvida Oq uy apparatini boshqarishi kerak bo‘lgan Syuzi Uayls bilan uchrashganini qayd etgan edi.
WSJ manbalariga ko‘ra, Yermak Vashingtonga Tramp yordamchilari bilan munosabatlarni yaxshilash maqsadida tashrif buyurgan. Nashrning ta’kidlashicha, Ukraina “tinchlikka tayyorligini bildirishni rejalashtirmoqda”.
“Ammo bu barqaror tinchlik bo‘lishi kerak, beqaror, vaqtinchalik tinchlik AQSH yoki Ukraina manfaatlariga mos kelmaydi”, dedi Kiyevning rejalari bilan tanish bo‘lgan nashr suhbatdoshi.
Avvalroq Bloomberg nashri NATOga a’zo davlatlarning hukumatlari Ukrainadagi urushni tugatishning turli ssenariylarini ko‘rib chiqayotgani haqida xabar bergan edi.
Manbalardan biriga ko‘ra, o‘t ochishni to‘xtatishning ehtimoliy variantlaridan biri demilitarizatsiya zonasini tashkil etishdir. NATOning yuqori lavozimli diplomati Yevropa qo‘shinlari bu hududni qo‘riqlashi va patrullik qilishi mumkinligini aytdi. Boshqa bir G‘arb diplomati bu muhokamalar Ukrainadagi vaziyat beqarorligi va muzokaralar yaqin orada boshlanishi ehtimolidan dalolat berishini ta’kidladi.
Yevropa ittifoqchilar uchun bu ssenariylar AQSHning yangi saylangan prezidenti Donald Trampga Yevroittifoq ta’sirini ko‘rsatib qo‘yishini aytmoqda. Muhokamalar NATO bosh kotibi Mark Ryutte har qanday o‘t ochishni bir chetga qo‘yib, e’tiborni Ukrainaga qurol yetkazib berishni ko‘paytirishga qaratmoqchi bo‘lgan bir paytda bo‘lib o‘tdi.
Biz Ukrainani qo‘llab-quvvatlashdan tashqari ko‘proq ish qilishimiz kerak... Biz bu urush yo‘nalishini butunlay o‘zgartirish uchun yetarli yordam ko‘rsatishimiz zarur, degan Ryutte.
Izoh (0)