Rossiya Mudofaa vazirligi NATOga qarshi ehtimoliy harbiy to‘qnashuvga tayyorgarlik ko‘rishni boshlaydi. Bu haqda mamlakat mudofaa vaziri Andrey Belousov xabar berdi.
Belousovga ko‘ra, vazirlik kelgusi faoliyatida “o‘rta muddatli istiqbolda vaziyatning har qanday rivojlanishiga to‘liq tayyorligini ta’minlash”ni inobatga oladi. U “yaqin o‘n yillikda Yevropada NATO bilan harbiy mojaro yuzaga kelishi mumkin”ligini istisno etmadi.
Bunga 2024-yilning iyul oyida bo‘lib o‘tgan Shimoliy Atlantika alyansining sammitida qabul qilingan qarorlar dalolat beradi. Shuningdek, bu AQSH va NATOning boshqa mamlakatlari doktrinalarida o‘z aksini topgan, dedi u.
Bundan tashqari, Belousov Rossiya armiyasi “innovatsiyalarga yanada moslashuvchan va sezgir bo‘lishi kerak”ligini aytdi. U taktik, operativ va strategik jihatdan urush mohiyatini tubdan o‘zgartiradigan texnologiyalarni nazarda tutdi.
Belousov bunda “sun’iy intellekt va katta hajmdagi ma’lumotlarni qayta ishlash, robototexnika, yuqori tezlikda himoyalangan ma’lumot uzatish, mashinalararo o‘zaro aloqa, kvant hisoblashlar va kommunikatsiyalar”ni tilga oldi.
Rossiya NATOga hujum qiladimi?
Moskva bir necha bor NATOga tahdid solishi ehtimolini inkor etgan. Bu haqda, xususan, iyun oyida Rossiya prezidenti Vladimir Putin ham gapirgandi.
Rossiya NATOga hujum qilmoqchi, degan uydirmalarni o‘ylab topishdi. Sizlar butunlay aqldan ozganmisizlar? degandi Putin. U buni “oddiy fuqarolarni qo‘rqitish uchun to‘qilgan gaplar” deb atagan.
G‘arb siyosatchilari Ukrainadagi urush fonida NATO va Rossiya o‘rtasidagi ziddiyat xavfi haqida bir necha bor ogohlantirgan. Masalan, iyun oyida Germaniya mudofaa vaziri Boris Pistorius armiya 2029-yilgacha urushga tayyor bo‘lishi kerakligini aytdi.
NATO va Rossiya o‘rtasidagi harbiy mojaroni Polsha prezidenti Andjey Duda ham istisno etmadi. Siyosatchi agar G‘arb Ukrainaning urushda mag‘lub bo‘lishiga yo‘l qo‘ysa, unda “Rossiya va G‘arb o‘rtasidagi potentsial urush juda yaqin” bo‘lishini aytdi.
Xavotirlar, shuningdek, Ukrainaning NATOga intilishi bilan bog‘liq. Rossiya bunga qarshi bo‘lib, Ukrainaning alyansga a’zolikdan voz kechishini mojaroni hal etish shartlaridan biri deb ataydi.
Rossiya Tashqi ishlar vazirligining ta’kidlashicha, Kiyevning blokga taklif qilinishi diplomatik kelishuvga “chek qo‘yadi”, “ittifoqning Rossiyaga qarshi jangovar harakatlarga bevosita jalb qilinishini muqarrar qilib qo‘yadi va nazoratsiz eskalatsiyaga olib keladi”.
NATO rahbariyati Rossiya allaqachon G‘arb bilan yangi dunyo tartibi uchun “gibrid urush” olib borayotganini ma’lum qilgan. Rossiya Xavfsizlik kengashi raisi o‘rinbosari Dmitriy Medvedev, o‘z navbatida, NATO mamlakatlari Rossiya bilan gibrid urushda emas, balki to‘liq urushda bevosita ishtirok etayotganini aytgan.
Izoh (0)