Germaniya kansleri Olaf Shols AQSHning saylangan prezidenti Donald Trampning NATO a’zolari yalpi ichki mahsulotning (YIM) kamida 5 foizini mudofaa uchun sarflashi haqidagi talabini rad etdi.
Kansler Bielefeld shahridagi saylovchilar bilan uchrashuvda bunga o‘z munosabatini bildirgan.
“Yiliga besh foiz ajratsak, bu 200 milliard yevrodan (204 milliard dollar) oshadi, federal byudjet esa 500 milliard yevroga ham yetmaydi”, degan Shols.
Siyosatchining ta‘kidlashicha, bunga faqat soliqlarni katta miqdorda oshirish yoki muhim loyihalarga moliyaviy oqimlarni qisqartirish bilan erishish mumkin. Kansler uning mamlakati yalpi ichki mahsulotning kamida 2 foizini mudofaaga ajratish bo‘yicha NATOning joriy talabiga rioya qilinishiga va’da berdi. Germaniya bu ko‘rsatkichga Sovuq urush tugaganidan beri ilk bor 2024-yili erishdi.
“Iqtisodiy mahsulotimizning 2 foizini mudofaaga sarflashda davom etishimizga kafolat beraman. Bu yechim emas, degan odam pul qayerdan kelishini ham aytishi kerak”, dedi Sotsial-demokratik partiya (SPD) a’zosi Olaf Shols.
Germaniya mudofaa xarajatlarini Rossiyaning Ukrainaga keng ko‘lamli bosqinidan so‘ng tashkil etilgan 100 milliard yevrolik maxsus jamg‘arma hisobiga ko‘paytirdi. Bu esa yangi qurol-yarog‘lar sotib olish, Bundesverning aloqa va razvedka infratuzilmasni raqamlashtirish va zaxiralar shakllantirsh uchun moliyaviy manba sifatida xizmat qildi.
Biroq Germaniya konstitutsiyasida mustahkamlangan byudjet prioritetlari va kamomadlarga qarshi qat’iy qoidalar sharoitida, mudofaaa xarajatlarining hozirgi darajasini qanday ushlab turish savol ostida qolyapti.
2025-yilning fevral oyida bo‘lib o‘tishi kutilayotgan saylovlarda Yashillar partiyasidan asosiy nomzod sifatida ishtirok etayotgan Germaniyaning amaldagi vitse-kansleri Robert Xabek esa mudofaa xarajatlarini YIMning 3,5 foizigacha oshirishga chaqirdi.
So‘rovlarda yetakchilik qilayotgan muxolif o‘ng markazchi CDU/CSU bloki esa partiyaning saylovoldi manifestiga YIMning kamida 2 foizini mudofaa uchun sarflash va’dasini kiritdi.
Qrim anneksiyasidan so‘ng NATO o‘z oldiga mudofaa xarajatlarini YIMning 2 foiziga yetkazish maqsadini qo‘ygandi. Biroq o‘tgan hafta AQSHning saylangan prezidenti Donald Tramp alyans a’zolaridan 5 foizlik ko‘rsatkichni talab qildi. Reuters nashrining alyans rasmiylariga tayanib yozishicha, NATO bunga rozi bo‘lmaydi.
Izoh (0)