Donald Tramp prezident sifatida birinchi marta 2019-yilda AQSH Daniyadan Grenlandiyani sotib olishi mumkinligini aytgandi. Daniya razvedkasi bunga Rossiyaning provokatsiyasi sabab bo‘lganini ma’lum qildi.
Razvedkaga ko‘ra, Rossiya agentlari o‘sha paytdagi Grenlandiya tashqi ishlar vaziri Ane Lone Bagger nomidan AQSH senatori Tom Kottonga soxta xat yo‘llagan. Xatda vazir AQSHdan ko‘rsatilgan “moliyaviy yordam” uchun minnatdorlik bildirib, Grenlandiyani Daniyadan mustaqil qilish uchun tezroq referendum o‘tkazishga va’da bergan.
Aslida, Ane Lone Bagger bunday xat yozmagan, biroq Tramp tarafdori Kotton xatni olganidan so‘ng Grenlandiyani sotib olishni taklif qilgan. Ayrim ma’lumotlarga ko‘ra, aynan Kottonning so‘zlaridan so‘ng Tramp bu haqida jiddiy o‘ylay boshlagan.
Daniya razvedkasi versiyasiga ko‘ra, Rossiya maxsus xizmatlari NATO mamlakatlarini ajratish va Arktikada Rossiya hamda Xitoy ta’sirini kuchaytirish maqsadida senatorga xatni soxtalashtirgan.
O‘sha paytda, 2019-yilda, Kopengagen hukumati Trampning gaplariga masxara bilan javob qaytargan, Tramp esa jahli chiqib, Daniyaga davlat tashrifini bekor qilgandi. Hozir, 20-yanvargi inauguratsiya oldidan, Tramp yana Grenlandiyani sotib olish g‘oyasini yangiladi va hatto kuch ishlatish ehtimolini nazarda tutdi.
Bu safar Kopengagen ehtiyotkorlik bilan yondashishga qaror qildi. Bosh vazir Mette Frederiksen Grenlandiyada hamkorlikni kuchaytirish masalasini muhokama qilishni taklif qildi, Daniya Mudofaa vazirligi esa orolda harbiy mavjudlikni oshirish rejalari haqida gapirdi.
Izoh (0)