НАТО бош котиби Марк Рютте Европа иттифоқи мамлакатлари мудофаага кўпроқ пул сарфлаш учун баъзи харажатларини қайта кўриб чиқиши кераклигини айтди. Бу ҳақда у Европарламентда сўзлаган нутқида маълум қилди.
Рюттенинг фикрича, мудофаа харажатлари кўрсаткичини ялпи ички маҳсулотнинг 2 фоизида ошириш зарур. У ўз мақсадларидан бири сифатида НАТО ва Европа иттифоқини яқинлаштириш эканини таъкидлади. Бу орқали Кремль олиб бораётган “беқарорлаштириш кампаниялари”га ҳамда Хитой ва Эрондан келаётган таҳдидларга қарши туришни назарда тутди.
“Ҳозир биз хавфсизмиз, аммо тўрт-беш йилдан сўнг аҳвол қандай бўлади...”, деди НАТО бош котиби. У агар мудофаа харажатлари оширилмаса, европаликлар “рус тили курсларига боришга ёки Янги Зеландияга кўчиб кетишга” мажбур бўлишини таъкидлади.
“Мен Европадаги хавфсизлик вазиятидан чуқур ташвишдаман. Биз на уруш, на тинчлик ҳолатидамиз. Бу шуни англатадики, мудофаага кўпроқ маблағ сарфлашимиз ва салоҳиятимизни оширишимиз зарур. Буни кечиктириб бўлмайди. Жамиятларимиз ва муҳим инфратузилмамиз барқарорлигини кучайтириш лозим”, деди Рютте.
Financial Times хабар беришича, АҚШнинг сайланган президенти Дональд Трамп НАТО мамлакатлари ҳар йили ЯИМнинг камида 5 фоизини мудофаага сарфлашини хоҳлайди. Ҳозирги НАТО ичидаги келишувларга кўра, аъзо давлатлар мудофаага ЯИМнинг камида 2 фоизини сарфлаши шарт (2024 йилда блокнинг 32 аъзосидан атиги 23 таси бу талабни бажарди).
НАТО мамлакатлари расмий вакиллари Трамп талаб қилаётган мудофаа харажатларини ошириш зарурлигига рози бўлган. Бироқ у таклиф этган 5 фоизлик кўрсаткични маъқуллашмаган. FТ манбаларидан бирининг фикрича, охир-оқибат Трамп 3,5 фоизлик даражага рози бўлиши мумкин, аммо бунинг эвазига у европалик иттифоқчилардан АҚШ билан янада фойдали савдо шартларини талаб қилади.
Изоҳ (0)