AQSH prezidenti Jo Bayden argentinalik futbolchi Lionel Messi, basketbolchi Medjik Jonson va Amerikani yaxshiroq qilishga hissa qo‘shgan yana 17 nafar shaxsni Prezidentning Ozodlik medali bilan mukofotladi. Bu haqda Oq uy xabar berdi.
Ma‘lum qilinishicha, Messi tig‘iz grafik tufayli taqdirlash marosimida qatnasha olmagan.
“Men uchun bunday e'tirofga sazovor bo'lish katta sharaf. Bu ulkan imtiyoz va bundan juda minnatdorman. Afsuski, avvaldan belgilangan majburiyatim bor, shuning uchun Oq uyda bo'lib o‘tadigan mukofotlash marosimida qatnasha olmayman. Biroq, shuni bilingki, ushbu harakatni chin dildan qadrlayman”, degan Messi.
Messi va Jonsondan tashqari, AQSH sobiq davlat kotibi Xillari Klinton, amerikalik milliarder Jorj Soros, amerikalik modelyer Ralf Loren, irlandiyalik musiqachi Bono, amerikalik aktyor Denzel Vashington va boshqalar Prezidentning Ozodlik medali bilan taqdirlangan.
♦ Prezidentning Ozodlik medali — fuqarolar uchun taqdim etiladigan AQSHning ikki eng yuksak mukofotidan biri bo‘lib, prezident qaroriga ko‘ra topshiriladi. Ozodlik medali xavfsizlik va AQSH milliy manfaatlarini himoya qilishga, butun dunyoda tinchlikni ta’minlashga, shuningdek, AQSH va jahonning ijtimoiy hamda madaniy hayotiga salmoqli hissa qo‘shgan shaxslar uchun beriladi.
2007-yilda Messi o‘zining xayriya fondini yaratdi va u orqali qiyin vaziyatlarda muhtoj bolalarga yordam beradi. Argentinalik futbolchi UNICEFning yaxshi niyat elchisi ham hisoblanadi.
♦ Messi 37 yoshda. U sakkiz karra “Oltin to‘p” sohibi hisoblanadi. Futbolchi 2023-yilning yozidan beri “Inter Miami”da o‘ynamoqda, uning shartnomasi 2025-yil oxirigacha amal qiladi. Argentinalik futbolchi allaqachon jamoa bilan Leagues Cup (2023), MLS muntazam chempionligini (2024) qo‘lga kiritgan, shuningdek, AQSH kubogi finaliga chiqqan.
Avvalroq Messi “Inter Mayami” uning faoliyatidagi so‘nggi klub bo‘lishini ma’lum qilgandi. 2000-yildan 2021-yilgacha argentinalik hujumchi “Barselona”, 2021-yildan 2023-yilgacha esa Fransiyaning “PSJ” jamoasida o‘ynagan. Messi Argentina terma jamoasida 189 ta o‘yin o‘tkazib, 112 ta gol urgan va 60 ta golli uzatmani amalga oshirgan. Milliy terma jamoa tarkibida u jahon chempionati (2022), “Finalissimo” (2022) va ikki marta Amerika kubogini (2021, 2024) hamda Olimpiadada (2008) g‘olib chiqqan.
Izoh (0)