Xitoy hukumati dezinformatsiya, senzura va dissidentlarni (hukumatga qarshi fikrlovchilar) ta’qib qilish uchun “misli ko‘rilmagan resurslar”ga sarmoya qilmoqda. Bu haqda AQSH davlat departamenti bayonotida aytiladi.
Davlat departamentining ta’kidlashicha, XXR xorijiy auditoriya orasida o‘z foydasiga ishlaydigan narrativlar yaratishga urinmoqda.
Hisobotda aytilishicha, “Xitoyning o‘z kuchiga ishonchi ortib bormoqda va ular axborotni manipulyatsiya qilish orqali manfaatlarini ilgari surish mumkinligiga ishonadi”.
Idora hisobotiga ko‘ra, Pekin Xitoyning siyosiy rahbariyatiga nisbatan tanqidlarni bostiruvchi noxolis bayonotlar tarqatish uchun milliardlab dollar sarflamoqda.
Xususan, davlat departamentining taʼkidlashicha, Xitoy davlat ommaviy axborot vositalari Rossiyaning Ukrainaga bostirib kirishidan so‘ng kremlparast yoki NATOga qarshi propogandani qo‘llab-quvvatlagan va kuchaytirgan.
“Masalan, ular Moskvaning Ukrainada AQSH tomonidan moliyalashtirilgan maxfiy biologik qurol ishlab chiqarish zavodlari mavjudligi haqidagi bayonotlarini tarqatgan. O‘z navbatida, Rossiya Tayvan va XXRning boshqa manfaatlari bilan bog‘liq propagandani targ‘ib qilmoqda”, — deyiladi xabarda.
Hisobotda, shuningdek, Xitoy hukumati mamlakatdagi rejim tanqidchilariga qarshi qo‘rqitish taktikasini qo‘llagani qayd etilgan.
Shu bilan birga, hisobotda aytilishicha, Pekin mahalliy OAV va fuqarolik jamiyatining qarshiligi tufayli demokratik mamlakatlarda manipulyativ axborotni targ‘ib qilishda jiddiy muvaffaqiyatsizliklarga duch kelgan.
Izoh (0)